Ташқи ишлар вазирлигида 2021 йилнинг 11 август куни вазирлик ходимлари ва Ўзбекистоннинг хориждаги дипломатик ваколатхоналари вакиллари иштирокида «Хориждаги Ўзбекистон фуқароларининг сайловдаги иштирокини кенг таъминлаш: меъёрий ҳуқуқий асослар, имкониятлар ва механизмлар» мавзусида давра суҳбати бўлиб ўтди.
Унда октябрда бўлиб ўтадиган Президент сайловида хорижда истиқомат қилаётган Ўзбекистон фуқароларининг иштирокини таъминлаш масаласи муҳокама қилинган.
Қайд этилишича, Ўзбекистоннинг дипломатик ваколатхоналари мавжуд бўлган 38 та давлатда 54 та (55 та дипваколатхона, Ўзбекистоннинг Нью-Йоркдаги бош консулхонаси ва БМТдаги ваколатхонасида биргаликдаги) стационар сайлов участкаси ташкил этилади. Қолаверса, ушбу давлатларнинг 128 та шаҳрида ва дипломатик ваколатхоналар мавжуд бўлмаган 11 давлатда қўшимча равишда жами 316 та кўчма сайлов пункти тайёрланиши режа қилинган.
Таъкидланишича, дипкорпус ва консуллик муассасалари томонидан сайловни хорижда юқори савияда ўтказиш мақсадида маҳаллий ҳокимият, диаспорал ташкилотлар ҳамда ўзбекистонлик меҳнат мигрантлари кўп жойлашган корхона раҳбарлари билан учрашувлар ўтказилмоқда.
Дипломатик ваколатхоналардан тўпланган маълумотларга кўра, чет элдаги сайловчиларнинг бирламчи рўйхати шакллантирилган. Дипломатик ваколатхоналар томонидан чет элдаги 151 ўзбек диаспорал ташкилоти билан ҳамкорлик алоқалари ўрнатилган.
Бундан ташқари, вазирлик таклифи асосида Ўзбекистон Ташқи меҳнат миграцияси агентлиги томонидан 34 та хориждаги ўзбек диаспораси билан чет давлатларда вақтинча меҳнат фаолиятини олиб бораётган Ўзбекистон фуқароларининг бандлигини таъминлаш ва уларнинг ҳуқуқ ҳамда манфаатларини ҳимоя қилиш соҳасида ҳамкорлик келишувлари имзоланган.
Бундан аввал Ўзбекистон Президенти сайловларини ўтказиш учун сайлов округлари ташкил этилгани, Мақсуда Ворисова Президентлик сайловида ғалаба қозонса, ислоҳотларни нимадан бошлашини маълум қилгани ҳамда Президент сайлови муносабати билан Ўзбекистонга келган ДИИҲБнинг илк миссияси хулосалари ҳақида маълумот берилгани ҳақида хабар берилганди.
Изоҳ (0)