Ўзбекистон Санитария-эпидемиологик осойишталик ва жамоат саломатлиги хизмати кўрсатмаси билан 9 августдан бошлаб аҳолини ўзбек-хитой вакцинасининг 2- ва 3-дозаси билан эмлаш вақтинча тўхтатилганди. Инновацион ривожланиш вазирлиги матбуот хизмати бу ZF-UZ-VAC 2001 вакцинаси билан бошланган оммавий эмлаш жараёнига салбий таъсир қилмаслигини маълум қилди.
«Эмлашнинг қисқа муддатли кечиктирилиши 1- ёки 2-дозадан кейин вакцина туфайли организмда ҳосил бўладиган антитаналар миқдорига ёки бошқа кўрсаткичларга таъсир кўрсатмайди.
Илмий-тадқиқотлар ҳамда кўп сонли аҳоли ўртасидаги оммавий эмлашнинг дастлабки натижаларига кўра Хитой дори воситаларини назорат қилиш агентлиги (CDC) томонидан вакцинанинг 1-дозаси ва 2-дозаси ўртасидаги оралиқни 2 ойгача чўзишга, иккинчи ва учинчи дозалар оралиғини эса 3 ойгача чўзишга рухсат берилган ва Хитойда бу амалиёт жорий қилинган. Ҳозирда Хитойда мазкур ZF-UZ-VAC 2001 вакцина билан 0, 2, 6 ой схемасида 140 миллион киши эмланган ва жараён давом этмоқда.
ZF-UZ-VAC 2001 вакцинаси устида борилган тадқиқотлар иккинчи ва учинчи дозалар оралиғидаги вақтнинг узайиши кўпроқ антитаналарнинг ҳосил бўлиши ва у кўпроқ муддат давомида сақланиб қолишига замин яратишини тасдиқламоқда. Бу тўғрисидаги маълумотлар қуйидаги ҳаволадаги илмий мақолада келтирилган: www.biorxiv.org ZF-UZ-VAC-2001 вакцинасини ишлаб чиқарувчилар томонидан берилган маълумотларга кўра, иккинчи ва учинчи доза ўртасидаги вақт интервалини ошириш коронавируснинг турли штаммларига нисбатан нейтраллашувчи титрларининг ошишига олиб келади», — дейилади вазирлик хабарида.
Шунингдек, Санитария-эпидемиологик осойишталик ва жамоат саломатлиги хизмати томонидан захирадаги ZF-UZ-VAC-2001 ўзбек-хитой вакцинасини фақат 1-доза билан эмлашга кўрсатма берилиши туфайли ижтимоий тармоқларда тарқалган «вакцинанинг аҳоли билмайдиган қандайдир ножоиз таъсири чиққани» тўғрисидаги тахминлар ёки «вакцина етишмас экан» деган миш-мишлар асоссиз экани ҳам билдирилди.
«Агар вакцинанинг ножўя таъсири аниқланганида, Соғлиқни сақлаш вазирлиги томонидан аҳоли ZF-UZ-VAC2001 вакцинасининг 1-дозаси билан эмланишига рухсат берилмаган бўлар эди. Қолаверса, жорий йилнинг 5—6 август кунлари 2 миллион доза ZF-UZ-VAC2001 вакцинаси юртимизга олиб келинди ва шу ойнинг ичида яна 2 миллион доза олиб келинади. Ҳукумат томонидан Ўзбекистонда икки турдаги вакцинани, жумладан, ZF-UZ-VAC2001 вакцинасини ишлаб чиқариш бўйича амалий ишлар олиб борилмоқда ва август ойининг охирига қадар бу ишлар йўлга қўйилади», — деб таъкидланган хабарда.
Соғлиқни сақлаш вазирлиги маълумотларига кўра, 9 августга келиб 10 663 284 доза вакцинадан фойдаланилган бўлиб, улардан 1-босқич эмланганлар 7 387 495 нафарни, 2-босқичда эмланганлар 2 377 313 нафарни, 3-босқич эмланганлар 898 476 нафарни ташкил қилди. Шу кунгача тўлиқ эмланган фуқаролар эса 1 360 237 нафарни ташкил қилмоқда.
Вазирлик маълумотларига кўра, Ўзбекистонда вакцина захираси 14 миллион 580 минг 60 дозани ташкил қилмоқда. Улардан 370 минг дозаси «Спутник V», 710 минг дозаси AstraZeneca, 10,5 миллион дозаси ZF-UZ-VAC2001, 3 миллион 60 дозаси Moderna вакцинасидир.
Изоҳ (0)