“O‘zbekistonda yilqichilik, ot sporti, zamonaviy beshkurash va poloni 2025-yilgacha rivojlantirish davlat dasturi to‘g‘risida”gi Prezident qarori qabul qilindi. Bu haqda Telegram’dagi “Huquqiy axborot” kanali xabar berdi.
Qarorga ko‘ra, 2021—2025-yillarda quyidagilar tashkil etiladi:
- 67 ta bolalar-o‘smirlar sport maktabida ot sporti turlari, shu jumladan, zamonaviy beshkurash bo‘yicha 52 ta, polo bo‘yicha 15 ta bo‘lim;
- har bir olimpiya zaxiralari kollejida ot sporti va zamonaviy beshkurash bo‘limlari;
- naslli va zotdor otlarni ko‘paytirish maqsadida Qoraqalpog‘iston Respublikasi va viloyatlarda 170 ta yilqichilik xo‘jaligi.
2022/2023-o‘quv yilidan:
- Samarqand veterinariya meditsinasi instituti hamda uning Nukus va Toshkent filiallarida yilqichilikka ixtisoslashgan veterinariya shifokorlari va zootexniklarini tayyorlash bo‘yicha bakalavriat ta’lim yo‘nalishi ochiladi;
- O‘zbekiston davlat jismoniy tarbiya va sport universiteti hamda uning Nukus va Farg‘ona filiallarida ot sporti bo‘yicha bakalavriat ta’lim yo‘nalishining maxsus sirtqi ta’lim shakli ochiladi.
2022-yil 1-sentabrgacha O‘zbekiston davlat jismoniy tarbiya va sport universiteti hududida 30 o‘rinli zamonaviy otxona binosi va ochiq sport maneji barpo etiladi.
Shuningdek, O‘zbekiston Prezidentining “Chavandozlar maktablari faoliyatini tashkil etish chora-tadbirlari to‘g‘risida”gi qarori qabul qilingan.
Ushbu qarorga ko‘ra, Qoraqalpog‘iston Respublikasi, viloyatlar va Toshkent shahrida ot sporti turlariga ixtisoslashtirilgan bolalar-o‘smirlar sport maktablari (Chavandozlar maktablari) va ularning tuman (shahar) seksiyalari tashkil qilindi.
Chavandozlar maktablari Milliy gvardiya tizimiga kiradi hamda maktabdan tashqari sport-ta’lim muassasasi hisoblanadi. Mazkur maktablar ot sporti (uchkurash, to‘siqlardan sakrash va ot yo‘rttirish), zamonaviy beshkurash, polo hamda uloq-ko‘pkariga ixtisoslashtiriladi. Ular o‘z faoliyatini 2022-yil 1-martdan boshlaydi, shuningdek, razryadli va unvonli sportchilar tayyorlash tizimi joriy etiladi. Chavandozlar maktablarining tuman (shahar) seksiyalari davlat-xususiy sheriklik asosida tashkil qilinadi.
Buning uchun xususiy sherikka (investorga):
- milliy valyutada ajratilgan kreditlarning 10 milliard so‘mdan oshmagan qismi bo‘yicha kredit foizi stavkasining Markaziy bank asosiy stavkasidan oshadigan, lekin asosiy stavkaning 1,5 baravaridan ko‘p bo‘lmagan qismi;
- xorijiy valyutadagi kreditlarning 10 milliard so‘m ekvivalentidan oshmagan qismi bo‘yicha foiz xarajatlarining tijorat banklari tomonidan belgilangan foiz stavkasining 30 foizigacha, lekin 3 foizdan ko‘p bo‘lmagan qismi 3 yil mobaynida kompensatsiya qilinadi.
2022-yil 1-martdan Chavandozlar maktablari faoliyati samaradorligi bo‘yicha reyting tizimi joriy qilinadi hamda uning natijalariga qarab xodimlar har yili BHMning 10 baravarigacha (2 million 450 ming so‘mgacha) miqdorda bir martalik pul mukofoti bilan rag‘batlantiriladi.
2022-yildan boshlab har yili “Eng yaxshi chavandoz”, “Eng yaxshi trener” tanlovlari tashkil etilib, g‘oliblar BHMning 10 baravaridan 30 baravarigacha (2 million 450 ming so‘mdan 7 million 350 ming so‘mgacha) miqdorda bir martalik pul mukofoti bilan rag‘batlantiriladi.
Qaror bilan, shuningdek, Chavandozlar maktablarida yuridik shaxs maqomiga ega bo‘lmagan, o‘z mablag‘lari hisobidan moliyalashtiriladigan Ippoterapiya markazlari tashkil qilinadi.
Eslatib o‘tamiz, 2019-yilda Qoraqalpog‘iston Respublikasi, Jizzax, Qashqadaryo, Navoiy, Samarqand, Surxondaryo, Sirdaryo, Toshkent, Xorazm viloyatlari va Toshkent shahrida davlat-xususiy sheriklik shartlari asosida bolalar-o‘smirlar ot sporti maktablari bosqichma-bosqich tashkil etilishi to‘g‘risida xabar berilgandi.
Izoh (0)