“Avaza” milliy sayyohlik zonasida Markaziy Osiyo xalqlarining milliy taomlari festivali va tantanali konsert bo‘lib o‘tdi. Bu haqda Prezident matbuot xizmati xabar qildi.
Prezidentlar dastlab milliy taomlar namunalarini ko‘zdan kechirdi.
So‘ng Markaziy Osiyo mamlakatlari san’at ustalari ishtirokida tantanali konsert dasturi bo‘ldi. Folklor-etnografik ansambllar va estrada xonandalarining chiqishlari zamonaviy sahna bezaklari bilan uyg‘unlashib, ajib manzara hosil qildi. Milliy kuy-qo‘shiq va raqslar xalqlar birligi, madaniy yaqinligini yaqqol namoyon etdi.
Markaziy Osiyo davlatlari rahbarlari maslahat uchrashuvining navbatdagi yig‘ilishi doirasida o‘tkazilgan ushbu tadbirlar, shuningdek, yetakchi ayollar muloqoti va mintaqa Iqtisodiy forumi Shavkat Mirziyoyev tashabbusi bilan tashkil topgan sammitning yangi bosqichga chiqqanidan dalolat beradi, deyiladi xabarda.
Bundan avval Turkmanboshida Markaziy Osiyo davlatlari prezidentlari sanoat ko‘rgazmasini ko‘zdan kechirgani haqida xabar berilgandi.
Izoh (0)