Bosh prokuratura huzuridagi Iqtisodiy jinoyatlarga qarshi kurashish departamenti Andijon va Xorazm viloyatlarida pul evaziga abituriyentlarni o‘qishga kiritib qo‘yishni va’da qilgan institut hisobchisi va talaba ushlanganini ma’lum qildi.
Departamentning Andijon shahar bo‘limi tomonidan viloyat DXX bilan hamkorlikda o‘tkazilgan tezkor tadbirda Andijon davlat tibbiyot instituti hisobchisi M.A. abituriyent D.ning ishonchiga kirib, uni yuqori lavozimda ishlovchi tanishlari orqali institutning “Pediatriya ishi” yo‘nalishiga o‘qishga kiritib qo‘yish evaziga 10 ming dollar bilan birga fuqarolik pasporti nusxasi va abituriyent varaqchasini olgan vaqtida ashyoviy dalillar bilan ushlangan.
Departamentning Xorazm viloyat boshqarmasi tomonidan o‘tkazilgan tezkor tadbirda esa Urganch davlat universiteti talabasi M.M. fuqaro S.ni ushbu universitetning tarix fakultetiga universitetda ishlovchi tanishlari orqali o‘qishga kiritib qo‘yish evaziga 5000 dollarni fuqaro O. orqali olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Bundan avval Andijonda fuqaroning o‘qishini 1500 dollar evaziga O‘shdan Namanganga ko‘chirib berishni va’da qilgan talaba qo‘lga olingandi. Shuningdek, Samarqand va Qashqadaryoda pul evaziga o‘qishga kiritib qo‘yishni va’da qilgan shaxslar ushlangani, Surxondaryo va Farg‘onada fuqarolarni o‘qishga kiritib qo‘yish evaziga pul so‘ragan talabalar qo‘lga tushgani haqida xabar berilgandi.
Izoh (0)