Туркманистон президент Гурбангули Бердимуҳамедов 2 август куни этраплар ва вилоятлар ҳокимлари билан йиғилиш ўтказди, унда давлат раҳбарига пахта етиштириш бўйича ишларнинг бориши ҳақида ҳисобот берилди. Бу ҳақда «Хроника Туркменистана» хабар қилган.
Йиғилишда ҳудудлар раҳбарлари картошка ва бошқа сабзавотларни етиштириш бўйича ишлар, қишлоқ хўжалиги техникасининг самарадорлиги, ижарачиларнинг дала экинлари билан таъминланганлиги, мамлакат мустақиллигининг 30 йиллиги муносабати билан қурилаётган объектлар ҳақида маълумот берган. Бердимуҳамедов февраль ойида ҳам олимларга картошка ҳосилдорлигини оширишни буюрганди.
Бердимуҳамедов ҳокимларнинг ҳисоботларини эшитиб, барча амалдорларга аҳолига йил давомида маҳаллий қишлоқ хўжалиги маҳсулотлари, мева-сабзавотлар ва бошқа озиқ-овқат маҳсулотларини етказиб бериш, шунингдек, пахта ҳосили режасини Туркманистон мустақиллигининг 30 йиллиги, яъни 27 сентябргача бажариш юзасидан топшириқлар берган.
«Айни вақтда асосий мақсад — ушбу муҳим санага қадар давлатга пахтани топшириш бўйича шартнома мажбуриятларини бажариш», — деган Гурбангули Бедимуҳамедов.
Ўтган йилларда вилоятларда пахта ҳосилини йиғиб олиш ишлари Туркманистонда сентябрнинг биринчи ярмида бошланарди. Одатда Гурбангули Бердимуҳамедовга пахтани давлатга топшириш режаси бажарилишининг дастлабки натижалари ҳақида октябрь охири, ноябрь бошларида ҳисобот берилади. 2020 йилда режанинг бажарилгани ҳақида 5 ноябрда ҳисобот берилган. Шунингдек, 2020 йили коронавирус пандемиясига қарамай талабалар пахта теримига жалб қилинганди.
«Хроника Туркменистана» нашри ер ижарачилари билан суҳбатлашган ва уларнинг сўзларига кўра, Туркманистонда пахта ҳосили қуруқ иқлим ва сувнинг камайиб кетиши оқибатида кеч шоналаган, шунингдек, пахта ҳосилини тезроқ етилтириш, уни йиғиб олиш учун қишлоқ хўжалиги техникаси етишмайди.
Изоҳ (0)