Ijtimoiy tarmoqlarda Sirdaryo viloyati hududida YPX xodimiga tegishli Nexia qarama-qarshi yo‘nalish bo‘ylab harakatlanib, Lacetti’ga urilgani aytilgan video tarqaldi. Viloyat IIB axborot xizmati mazkur voqea aslida qanday yuzaga kelgani tasvirlangan lavha bilan bo‘lishdi.
Ma’lum bo‘lishicha, 30-iyul kuni soat 11:00 larda Sirdaryo tumani hududidan o‘tuvchi Toshkent—Dushanbe M-34 avtomobil yo‘lining 81-kilometrida tuman IIB 3-sonli mahalla IIB YPX xodimlari xizmat olib borayotgan vaqtda Lacetti avtomobilini to‘xtatgan.
Avtomashinaga tegishli hujjatlarni tekshirish jarayonida Lacetti’ning orqa oynalarini qoraytirishga ruxsat bo‘lgan, biroq old yon oynalarning tusini o‘zgartirishga hujjat bo‘lmagani aniqlangan.
YPX inspektori belgilangan tartibda ma’muriy bayonnoma rasmiylashtirib, avtomobilni jarima maydonchasiga joylashtirishini aytgan vaqtida haydovchi xodimni xizmat vazifasini bajarishdan voz kechishga undagan — uni haqorat qilgan, mashinani orqa tomonga boshqarib, inspektor ustiga haydagan.
Haydovchi voqea joyidan ketmoqchi bo‘lganida YPX xodimi avtomobilning old tarafiga o‘tgan, biroq qoidabuzar haydovchi mashinani oldinga haydab, xodimga tan jarohati yetkazgan.
YPX inspektori B.Abdusamatov o‘ziga tegishli avtomobilda yuz bergan holat yuzasidan tuman IIB boshlig‘i nomiga bildirgi bilan murojaat qilish maqsadida bo‘limga yo‘l olgan. Yo‘lda ketish vaqtida qoidabuzar Lacetti haydovchisi o‘z mashinasini yo‘lning o‘ng tarafiga to‘xtatib, old yon oynalardagi “tonirovka”ni yulayotganini ko‘rgan va holatni tasvirga olish uchun mashinani ortga burgan.
YPX xodimining qaytayotganini ko‘rgan haydovchi boshqaruvidagi avtomobili bilan qasddan xodimning yo‘liga chiqib, yo‘l-transport hodisasi sodir etgan.
YPX xodimi haydovchiga barcha holatlar bodi-kamera yordamida tasvirga olinganini aytganida u bodi-kamera va inspektorning pogonini yulib olib, 25-30 metr uzoqlikka otib yuborgan.
Hozirda ushbu holat yuzasidan Sirdaryo tumani prokuraturasi tomonidan haydovchiga nisbatan Jinoyat kodeksining 219-modda (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) 2-qismi bilan jinoyat ishi qo‘zg‘atilib, Jinoyat-protsessual kodeksining 221-moddasi (ushlab turish asoslari) tartibida qamoqqa olingan.
Avvalroq Olmaliqda YPX xodimiga qoidabuzar Malibu’ni qo‘yib yuborishni buyurgan komandir intizomiy jazoga tortilgani, Toshkentdagi YPX mashinalarida qoidabuzarliklarni aniqlovchi yangi qurilma sinovdan o‘tkazilayotgani, Toshkentda haydovchini tegishli belgi qo‘yilmagan yo‘lda qoida buzganlikda ayblagan YPX xodimiga xizmat tekshiruvi tayinlangani to‘g‘risida xabar berilgandi.
Izoh (0)