Tojikistonda 5—10-avgust kunlari Tojikiston, O‘zbekiston va Rossiya qo‘shinlari ishtirokida uch tomonlama mashg‘ulotlar o‘tkaziladi. Bu haqda Mudofaa vazirligi Axborot va ommaviy kommunikatsiyalar departamenti “Daryo”ga ma’lum qildi.
Ma’lum qilinishicha, O‘zbekiston Mudofaa vazirligi bo‘linmasi mashg‘ulot o‘tkaziladigan joyga kolonnada yurish qilgan. Qo‘shni davlat hududida kolonnada yurishlariga O‘zbekiston havo kuchlarining “Mi-35” jangovar vertolyotlari hamrohlik qildi.
“Mashg‘ulotlarda tashqi tahdidlarga qarshi kurashish bo‘yicha vazifalar ustida ishlash kerak bo‘ladi. Mazkur hamkorlikdagi mashg‘ulotlardan ko‘zlangan asosiy maqsad Markaziy Osiyo mintaqasida barqarorlikni mustahkamlash, yuzaga kelishi mumkin bo‘lgan xavf-xatarlarning oldini olish va o‘zaro tajriba almashishdan iborat”, — deyiladi xabarda.
Ta’kidlanishicha, hamkorlikdagi mashg‘ulotlar Tojikistonning “Harb-Maydon” poligonida o‘tkaziladi.
Avvalroq Rossiya O‘zbekistonning Afg‘oniston bilan chegarasiga qo‘shin yuborib, qo‘shma harbiy mashg‘ulotlar o‘tkazishni boshlagani to‘g‘risida xabar berilgandi. Ikki davlat harbiylari ishtirok etadigan mashg‘ulotlarda 200 ga yaqin harbiy texnika, jumladan, aviatsiya vositalaridan foydalaniladi.
Izoh (0)