O‘zbekiston iste’mol bozoridagi tovarlar va xizmatlar iyul oyida ham o‘rtacha 0,2 foizga arzonlashdi

Davlat statistika qo‘mitasi iyul oyida an’anaviy ravishda deflyatsiyani qayd etdi, deb xabar bermoqda Spot qo‘mita ma’lumotlariga tayanib.

Ma’lum qilinishcha, iyul oyida tovarlar va xizmatlar o‘rtacha 0,2 foizga arzonlashdi. 2021-yil boshidan esa ular 4,2 foizga qimmatladi.

Ushbu holat, asosan, mavsumiy omil hamda meva va sabzavotlar narxi arzonlashgani bilan tavsiflanadi. Undan avvalgi yillarda ham shunday bo‘lgan: 2020- yilning iyul oyida tovarlar va xizmatlar oy davomida o‘rtacha 0,3 foizga, 2019- yilda esa 0,4 foizga arzonlashgan.

Oziq-ovqat mahsulotlari 0,9 foizga arzonladi, nooziq-ovqat mahsulotlar 0,5 foizga, xizmatlar esa 0,2 foizga qimmatladi. Markaziy bank 2021-yilda inflyatsiya 10 foiz atrofida bo‘lishini prognoz qilgandi. Hozircha bu taxmin o‘zini oqlamoqda.

Eslatib o‘tamiz, iyun oyida ham O‘zbekiston iste’mol bozoridagi tovarlar va xizmatlar o‘rtacha 0,2 foizga arzonlashgandi.