Ижтимоий тармоқларда Сирдарё вилояти ҳудудида ЙПХ ходимига тегишли Nexia қарама-қарши йўналиш бўйлаб ҳаракатланиб, Lacetti’га урилгани айтилган видео тарқалди. Вилоят ИИБ ахборот хизмати мазкур воқеа аслида қандай юзага келгани тасвирланган лавҳа билан бўлишди.
Маълум бўлишича, 30 июль куни соат 11:00 ларда Сирдарё тумани ҳудудидан ўтувчи Тошкент—Душанбе М-34 автомобиль йўлининг 81-километрида туман ИИБ 3-сонли маҳалла ИИБ ЙПХ ходимлари хизмат олиб бораётган вақтда Lacetti автомобилини тўхтатган.
Автомашинага тегишли ҳужжатларни текшириш жараёнида Lacetti’нинг орқа ойналарини қорайтиришга рухсат бўлган, бироқ олд ён ойналарнинг тусини ўзгартиришга ҳужжат бўлмагани аниқланган.
ЙПХ инспектори белгиланган тартибда маъмурий баённома расмийлаштириб, автомобилни жарима майдончасига жойлаштиришини айтган вақтида ҳайдовчи ходимни хизмат вазифасини бажаришдан воз кечишга ундаган — уни ҳақорат қилган, машинани орқа томонга бошқариб, инспектор устига ҳайдаган.
Ҳайдовчи воқеа жойидан кетмоқчи бўлганида ЙПХ ходими автомобилнинг олд тарафига ўтган, бироқ қоидабузар ҳайдовчи машинани олдинга ҳайдаб, ходимга тан жароҳати етказган.
ЙПХ инспектори Б.Абдусаматов ўзига тегишли автомобилда юз берган ҳолат юзасидан туман ИИБ бошлиғи номига билдирги билан мурожаат қилиш мақсадида бўлимга йўл олган. Йўлда кетиш вақтида қоидабузар Lacetti ҳайдовчиси ўз машинасини йўлнинг ўнг тарафига тўхтатиб, олд ён ойналардаги «тонировка»ни юлаётганини кўрган ва ҳолатни тасвирга олиш учун машинани ортга бурган.
ЙПХ ходимининг қайтаётганини кўрган ҳайдовчи бошқарувидаги автомобили билан қасддан ходимнинг йўлига чиқиб, йўл-транспорт ҳодисаси содир этган.
ЙПХ ходими ҳайдовчига барча ҳолатлар боди-камера ёрдамида тасвирга олинганини айтганида у боди-камера ва инспекторнинг погонини юлиб олиб, 25-30 метр узоқликка отиб юборган.
Ҳозирда ушбу ҳолат юзасидан Сирдарё тумани прокуратураси томонидан ҳайдовчига нисбатан Жиноят кодексининг 219-модда (ҳокимият вакилига ёки фуқаровий бурчини бажараётган шахсга қаршилик кўрсатиш) 2-қисми билан жиноят иши қўзғатилиб, Жиноят-процессуал кодексининг 221-моддаси (ушлаб туриш асослари) тартибида қамоққа олинган.
Аввалроқ Олмалиқда ЙПХ ходимига қоидабузар Malibu’ни қўйиб юборишни буюрган командир интизомий жазога тортилгани, Тошкентдаги ЙПХ машиналарида қоидабузарликларни аниқловчи янги қурилма синовдан ўтказилаётгани, Тошкентда ҳайдовчини тегишли белги қўйилмаган йўлда қоида бузганликда айблаган ЙПХ ходимига хизмат текшируви тайинлангани тўғрисида хабар берилганди.
Изоҳ (0)