Ijtimoiy tarmoqlarda erkak kishi tomonidan bir ayolga kuch ishlatilayotgani aks etgan videotasvir tarqaldi. Holat yuzasidan Toshkent shahar IIBB tomonidan tekshiruv o‘tkazilgan.
Qayd etilishicha, 2021-yilning 30-iyul kuni taxminan soat 11:00 larda 1986-yilda tug‘ilgan X.F. o‘zining turmush o‘rtog‘i 1991-yilda tug‘ilgan M.O. bilan birga Uchtepa tumani Cho‘ponota ko‘chasida ketayotgan vaqtida o‘zaro gap talashib janjallashib qolgan.
Oqibatda X.F. turmush o‘rtog‘i M.O.ga nisbatan kuch ishlatib, sochidan tortgan. Mazkur holat yuzasidan M.O. ichki ishlar organlariga murojaat qilmagan.
Uchtepa tumani IIO FMB xotin-qizlar masalalari bo‘yicha inspektorlar tomonidan o‘tkazilgan profilaktik suhbat jarayonida M.O. turmush o‘rtog‘iga nisbatan hech qanday e’tirozlari yo‘qligini, 2 nafar farzandi borligini va o‘zaro yarashib olishganini ma’lum qilib, himoya orderi olishdan bosh tortgan.
X.F. qilgan ishidan pushaymonligini, jahl ustida turmush o‘rtog‘iga kuch ishlatganini va turmush o‘rtog‘i bilan yarashib olganini ma’lum qilgan.
Hozirda mazkur holat yuzasidan Uchtepa tumani IIO FMB tomonidan tergovga qadar tekshiruv harakatlari olib borilmoqda.
Bundan avval Andijonda shar’iy nikohdagi eri boshqaga uylanayotgani uchun uni o‘ldirgan ayol 10 yilga qamalgani, Jizzaxda xotinini xiyonat qilishda ayblab, uni o‘ldirib qo‘ygan shaxs 14 yilga qamalgani hamda Samarqandda sobiq qaynona va kelin janjallashib, bir-birini jarohatlagani haqida xabar berilgandi.
Izoh (0)