Ўзбекистоннинг доимий аҳолиси сони 34,86 млн кишига етди

Ўзбекистоннинг доимий аҳолиси сони 2021 йил 1 июль ҳолатига кўра 34,86 миллион кишини ташкил этиб, йил бошидан 301,3 минг кишига ёки 0,9 фоизга кўпайди. Бу ҳақда Давлат статистика қўмитасининг мамлакатдаги демографик вазиятга бағишланган ҳисоботида сўз боради.

Жумладан, шаҳар аҳолиси сони 17,7 миллион кишини (жами аҳоли сонидаги улуши 50,7 фоиз), қишлоқ аҳолиси сони эса 17,2 миллион кишини (49,3 фоиз) ташкил этган.

Вилоятлар кесимида таҳлиллар шуни кўрсатмоқдаки, ҳудудларнинг республика жами аҳолиси сонидаги улуши бўйича энг кўп кўрсаткич Самарқанд вилоятида — 11,4 фоизни, кейинги ўринларда Фарғона вилояти — 11,1 фоизни, Қашқадарё вилояти — 9,6 фоизни ва Андижон вилояти — 9,2 фоизни ташкил этган.

Республика доимий аҳолиси сонининг 31,1 фоизи — меҳнатга лаёқатли ёшдан кичиклар, 58 фоизи — меҳнатга лаёқатли ёшдагилар ва 10,9 — фоизи меҳнатга лаёқатли ёшдан катталар ҳиссасига тўғри келмоқда.

2021 йилнинг январь—июнь ойларида мамлакатда 390,7 мингта бола туғилгани қайд этилган бўлиб, бу 2020 йилнинг биринчи ярим йиллигига нисбатан қарийб 7 фоизга кўп демак (365,6 минг). Мос равишда 1000 аҳолига нисбатан туғилиш коэффициенти 22,7 промиллени ташкил этган ҳамда 2020 йилга нисбатан 1,1 промиллега ошганлиги кузатилган (2020- йилда 21,6 промиллени ташкил этган).

Туғилганлар сони ойлар бўйича таҳлил этилганда энг кўп қайд этилган туғилганлар сони 2020 йилда июнь ойида (74 448 киши) кузатилган бўлса, 2021 йилда ҳам июнь ойига (78 888 киши) тўғри келган. Аксинча, энг кам қайд этилган туғилганлар сони 2020 йилда апрель ойида (55 161 киши) кузатилган бўлса, 2021 йилда февраль ойида (53 759 киши) кузатилган.

2021 йилнинг дастлабки олти ойида 79,7 мингта ўлим қайд этилган бўлиб, ҳар 1000 аҳолига ўлим коэффициенти 4,6 промиллени ташкил этган ҳамда 2020 йилга нисбатан 0,2 промиллега ошган (2020 йилнинг январь— июнь ойларида 4,4 промилле бўлган).

2021 йилнинг январь— июнь ойларида вафот этганлар ҳудудлар бўйича таҳлил этилганда ҳар 1000 аҳолига нисбатан энг кўп ўлим ҳолати Тошкент шаҳрида (6 промилле) қайд этилган. Аксинча, ҳар 1000 аҳолига нисбатан энг кам ўлим ҳолати Жиззах ва Қашқадарё вилоятларида (4 промилле) қайд этилди.

Дастлабки олти ой давомида қайд этилган ўлим ҳолатининг 61,4 фоизи — қон айланиш тизими касалликларидан, 9,4 фоизи – ўсимталардан, 5,7 фоизи — бахтсиз ҳодиса, заҳарланиш ва жароҳатланишлардан, 4,9 фоизи — овқат ҳазм қилиш аъзолари касалликларидан, 4,5 фоизи — нафас олиш аъзолари касалликларидан, 1,9 фоизи — юқумли ва паразитар касалликлардан ҳамда 12,2 фоизи — бошқа касалликлардан вафот этган.

Рўйхатга олинган бир ёшгача вафот этган болаларнинг 59,2 фоизи — перинатал даврда юзага келадиган ҳолатлардан, 18,4 фоизи — нафас олиш аъзолари касалликларидан, 11,4 фоизи – туғма аномалиялардан, 2,8 фоизи — юқумли ва паразитар касалликлардан, 1,8 фоизи — бахтсиз ҳодиса, заҳарланиш ва жароҳатланишлардан, 0,7 фоизи — овқат ҳазм қилиш аъзолари касалликларидан ва 5,7 фоизи — бошқа касалликлардан вафот этган.

2021 йилнинг ўтган ярим йиллигида 119 мингта никоҳ қайд этилган бўлиб, бу 2020 йилнинг мос даврида нисбатан 1,6 баробарга кўп демак (75,6 минг).

Энг юқори никоҳ коэффициенти (промилледа) Хоразм вилояти (8,2), Қорақалпоғистон Республикаси (8,2), Бухоро вилояти (7,8) ва Тошкент шаҳрида (7,5) кузатилган. Энг кам никоҳ тузиш коэффициенти эса Андижон (6), Наманган (6), Қашқадарё (6,1) ва Фарғона (6,4) вилоятларида кузатилган.

2021 йилнинг январь—июль ойларида ажримлар сони 19,4 мингтани ташкил этган, бу 2020 йилнинг биринчи ярим йиллигига нисбатан 1,5 баробарга кўп (12,8 минг). Таъкидлаш керакки, 2018 ва 2019 йилларда ажримлар сони биринчи ярим йилликда нисбатан барқарор бўлган — мос равишда 16,4 ва 16 минг.

Энг юқори никоҳдан ажрашганлар коэффициенти (промилледа) Тошкент шаҳри (2,1), Сирдарё (1,5), Тошкент (1,4) ва Навоий (1,3) вилоятларида қайд этилган.