Amerikalik aktyor, prodyuser va rejissor Tom Xenks Bonhams auksioni orqali Toyota Land Cruiser FJ40 avtomobilini sotadi. Zamonaviy dvigatel va uzatmalar qutisi, maxsus “podveska”, qulay o‘rindiqlar, tormoz va gidrokuchaytirilgan rul o‘rnatilgan model kamida 75 ming dollarga baholanmoqda, deb xabar beradi Motor.
Klassik Toyota Land Cruiser FJ40 1980-yilda ishlab chiqarilgan, Tom Xenks esa yo‘ltanlamasni ancha qulaylashtirgan. Toyota’ning olti litrli dvigateli o‘rnini General Motors 4,3 litrli V6 L35 agregati egallagan, shtat uzatmalar qutisi esa GM’ning besh pog‘onali “mexanikasiga” almashtirilgan.
Amerika sertifikat organlari mazkur dvigateldan foydalanishni ma’qullagan, jumladan, GM motori o‘rnatilgan Land Cruiser’ni barcha shtatlarda, xususan, Kaliforniyada ham haydashga ruxsat bord. Rul boshqaruvi uchun gidrokuchaytirgich, tormoz kuchaytirgich, Toyo pokrishkalari o‘rnatilgan, salonida Porsche’ning kovshsimon o‘rindiqlari va konditsioner paydo bo‘lgan. Sony audiotizimi nostandart, ammo uni zamonaviy deb bo‘lmaydi — bu 1990-yillar boshiga tegishli oddiy radiopriyomnik.
Land Cruiser FJ40 interyerining o‘ziga xos jihati — old panelga Tom Xenksning dastxati tushirilganida. Shuningdek, 40 yillik yo‘ltanlamasning tarixini tasdiqlovchi hujjatlar ham bor; odometrga ko‘ra, mashina 84 580 kilometr yo‘l bosgan. Xaridor mashina bilan birga Toyota FJ40’ning original g‘ildiraklar jamlanmasiga ham ega bo‘ladi.
Bonhams kimoshdi uyi Tom Xenksning avtomobili 75—125 ming dollarga sotilishini baholamoqda, ammo mutaxassislar adashgan bo‘lishi ham mumkin. Savdolar 13-avgust kuni bo‘lib o‘tadi, zaxira ko‘zda tutilmagani sabab yo‘ltanlamas har qanday holatda ham o‘z egasini almashtiradi.
Avvalroq Kaliforniyada Tom Xenksga tegishli g‘ildiraklar ustidagi uy auksionga qo‘yilishi to‘g‘risida xabar berilgandi. Xenks avtouyga 24 yil davomiga egalik qilib, AQShning deyarli barcha shtatlariga safar uyushtirgan.
Izoh (0)