Germaniyaning Kyoln shahrida 1950-yilda ishlab chiqarilgan va hozirga qadar 50 ming kilometr yo‘l bosgan qora “GAZ-12 ZIM” sotuvga qo‘yildi. Ideal holatda saqlangan 90 ot kuchiga ega olti o‘rindiqli hukumat avtomobili 70 ming yevroga baholanmoqda, deb xabar beradi Motor.
“GAZ-12 ZIM” birinchi bor konveyerdan 1948-yilda chiqqan bo‘lib, Gorkiy avtomobil zavodining birinchi seriyali hukumat avtomobiliga aylangan. Afsonaviy “GAZ-13”ning ajdodiga aylangan model SIKP MQ partiya nomenklaturasining yuqori rahbariyati uchun mo‘ljallangan. Konstruktorlar yangi avtomobilning deyarli 50 foiz ehtiyot qismlarini “GAZ-51” va “GAZ-20” modellaridan olgan.
Sotuvga qo‘yilgan nusxa ideal holatda. Qora kuzovga ega avtomobilda korroziya elementlari yo‘q, qizil charmli saloni esa deyarli yangidek. Odometriga ko‘ra, sovet sedani 50 ming kilometr yo‘l bosgan.
“GAZ-12 ZIM” 90 ot kuchiga ega 3,5 litrli benzin dvigatel yordamida harakatga keladi. Agregat uch pog‘onali mexanik uzatmalar qutisi yordamida boshqariladi. Avtomobil soatiga 100 kilometr tezlikka 37 soniyada erishadi, maksimal tezligi — 120 kilometr/soat.
Sotuvchi noyob sovet sedani qanday qilib Germaniyaga borib qolganiga izoh bermagan.
Avvalroq Moskvada xususiy kolleksiyada saqlanayotgan 65 yillik “GAZ-12 ZIM” sotuvga qo‘yilgani to‘g‘risida xabar berilgandi. 90 ot kuchiga ega dvigatel o‘rnatilgan va hozirga qadar 60 ming kilometr yo‘l bosgan noyob avtomobil 7,7 million rublga (105 ming dollar) baholangan edi.
Izoh (0)