Америкалик актёр, продюсер ва режиссёр Том Хэнкс Bonhams аукциони орқали Toyota Land Cruiser FJ40 автомобилини сотади. Замонавий двигатель ва узатмалар қутиси, махсус «подвеска», қулай ўриндиқлар, тормоз ва гидрокучайтирилган руль ўрнатилган модель камида 75 минг долларга баҳоланмоқда, деб хабар беради Motor.
Классик Toyota Land Cruiser FJ40 1980 йилда ишлаб чиқарилган, Том Хэнкс эса йўлтанламасни анча қулайлаштирган. Toyota’нинг олти литрли двигатели ўрнини General Motors 4,3 литрли В6 Л35 агрегати эгаллаган, штат узатмалар қутиси эса GM’нинг беш поғонали «механикасига» алмаштирилган.
Америка сертификат органлари мазкур двигателдан фойдаланишни маъқуллаган, жумладан, GM мотори ўрнатилган Land Cruiser’ни барча штатларда, хусусан, Калифорнияда ҳам ҳайдашга рухсат борд. Руль бошқаруви учун гидрокучайтиргич, тормоз кучайтиргич, Тоyo покришкалари ўрнатилган, салонида Porsche’нинг ковшсимон ўриндиқлари ва кондиционер пайдо бўлган. Sony аудиотизими ностандарт, аммо уни замонавий деб бўлмайди — бу 1990 йиллар бошига тегишли оддий радиоприёмник.
Land Cruiser FJ40 интерьерининг ўзига хос жиҳати — олд панелга Том Хэнкснинг дастхати туширилганида. Шунингдек, 40 йиллик йўлтанламаснинг тарихини тасдиқловчи ҳужжатлар ҳам бор; одометрга кўра, машина 84 580 километр йўл босган. Харидор машина билан бирга Toyota FJ40’нинг оригинал ғилдираклар жамланмасига ҳам эга бўлади.
Bonhams кимошди уйи Том Хэнкснинг автомобили 75—125 минг долларга сотилишини баҳоламоқда, аммо мутахассислар адашган бўлиши ҳам мумкин. Савдолар 13 август куни бўлиб ўтади, захира кўзда тутилмагани сабаб йўлтанламас ҳар қандай ҳолатда ҳам ўз эгасини алмаштиради.
Аввалроқ Калифорнияда Том Хэнксга тегишли ғилдираклар устидаги уй аукционга қўйилиши тўғрисида хабар берилганди. Хэнкс автоуйга 24 йил давомига эгалик қилиб, АҚШнинг деярли барча штатларига сафар уюштирган.
Изоҳ (0)