Toshkent viloyati Olmaliq shahriga eltuvchi A-373 trassasida jaziramada yalpi hashar o‘tkazilayotgani haqida xabar berilgandi. Mazkur holat yuzasidan viloyat Bandlik bosh boshqarmasi izoh berdi.
Ma’lum qilinishicha, viloyat Bandlik bosh boshqarmasi tomonidan Vazirlar Mahkamasining 2017-yil 5-oktabrdagi 799-son qarori bilan tasdiqlangan “Haq to‘lanadigan jamoat ishlarini tashkil qilish tartibi to‘g‘risida”gi nizom ijrosi yuzasidan vaqtinchalik tashkil etilgan haq to‘lanadigan jamoat ishlarida ishlagan fuqarolarga tegishli tartibda oylik ish haqlari to‘lab beriladi.
“Tasvirlardagi fuqarolarning aksariyati obodonlashtirish xodimlari bo‘lib, ular mehnat qonunchiligida belgilangan tartibda, ish kunida o‘z vazifalarini bajarmoqda.
Shuningdek, ish hajmi kattaligi bois hashar yo‘li orqali viloyat Bandlik bosh boshqarmasi tomonidan jamoat ishchilari ham vaqtinchalik ishga ixtiyoriy jalb qilingan. Ularning ham ish haqlari belgilangan tartibda to‘lab beriladi”, – deyiladi boshqarma izohida.
Bundan avval Qashqadaryoda xodimlarini majburiy mehnatga jalb qilgan tibbiyot birlashmasi boshlig‘i 12 mln so‘m jarimaga tortilgani, O‘rta Chirchiqda tibbiyot xodimlarini majburiy mehnatga jalb etgan poliklinika rahbari jarimaga tortilgani hamda xodimini haqorat qilgan O‘rta Chirchiq obodonlashtirish boshqarmasi boshlig‘i ishdan olingani haqida xabar berilgandi.
Izoh (0)