Qashqadaryo viloyatining Kitob tumanidagi yuqumli kasalliklar shifoxonasida koronavirusga chalingan bemorlar davolanayotgani, shifoxonaga kirib-chiqishda nazorat yo‘qligi, shuningdek, bemorlar bilan ishlayotgan shifoxona xodimlariga koronavirusdan himoyalanish uchun maxsus forma berilmayotgani ma’lum qilindi.
Bu haqda “Daryo”ga bildirgan shifoxona xodimlarining aytishicha, xodimlar 400 ming so‘mdan 800 ming so‘mgacha maosh oladi. Va aynan shu maosh evaziga ular shifoxonada koronavirusdan davolanayotgan bemorlarga qarashga majbur.
“Eng yomoni xodimlarga maxsus kiyim bosh ham berilmaydi. Hammamiz doimgidek ish formada og‘ir kasallar bilan ishlab kelyapmiz. Rahbariyat bunga umuman e’tibor qaratmayapti. Shifoxonamizda ega yo‘q”, — deydi shu maskanda ishlovchi ishchilardan biri.
Murojaatchilarning qo‘shimcha qilishicha, fuqarolarning shifoxonaga kirib-chiqishi ham nazorat qilinmaydi.
“Xohlagan odam kelib, xohlagan bemorining oldiga kirib-chiqib ketyapti. Nazorat yo‘q”, — deydi shifoxona xodimi.
Mazkur videodagi holatni izohlagan Kitob tuman tibbiyot birlashmasi bosh shifokori Shavkat G‘afforovning aytishicha, tumanda koronavirus bemorlari bilan ishlash uchun shifoxona xodimlariga yetarli darajada maxsus forma bor.
“Ayni kunda shifoxonamizda musbat natija bilan yotgan bemor yo‘q. Shifoxonada davolanayotgan bemorlarning barchasi koronavirusdan keyingi asoratlangan va musbat natija bermagan, pnevmoniya bilan og‘rigan bemorlar bo‘lib, ularga kislorod ballonlari ulangan. Kislorod stansiyamiz o‘sha yerda bo‘lgani uchun kislorodga muhtoj bemorlarni shu yerda yotqizishga majburmiz”, — deydi tuman tibbiyot birlashmasi bosh shifokori Shavkat G‘afforov.
Bosh shifokorning ma’lumot berishicha, shifoxonada pnevmoniya bilan og‘rigan va kislorod ballonga ehtiyoj sezgan bemorlar o‘ttiz nafardan ortiqni tashkil qiladi.
“Bu bemorlardan koronavirus yuqmaydi. Shuning uchun shifoxonamiz xodimlari vahima qilmasa ham bo‘ladi. Bu haqda ularga aytilgan va tushuntirilgan”, — deydi bosh shifokor.
Shavkat G‘afforovning ma’lumot berishicha, ayni kunga qadar tumanda koronavirusga test jarayonlarida musbat natija qayd etgan bemorlar davolanish uchun Qarshi shahriga yuborilgan.
“Endilikda bugundan, 2021-yilning 26-iyulidan boshlab tuman yuqumli kasalliklar shifoxonasi negizida 100 o‘rinli koronavirus bemorlarini davolash uchun maxsus shifoxona tashkil etilib, Yakkabog‘, Shahrisabz shahar va tuman, shuningdek, Kitob tumanidagi bemorlar uchun xizmat ko‘rsatadi”, — deydi mas’ul shifokor.
Bosh shifokorning qo‘shimcha ma’lumot berishicha, maxsus shifoxona tashkil etilgach, tibbiyot xodimlari uchun maxsus kiyim bosh va koronavirus bemorlari bilan ishlagani uchun rag‘bat pullari ham beriladi. Qolaversa, shifoxonaga kirib-chiqish ham Milliy gvardiya xodimlari tomonidan nazorat qilinadi.
Izoh (0)