26-iyul kuni respublika bo‘ylab prezident maktablariga imtihonlar boshlandi. Karantin sabab imtihonlar ochiq maydonda o‘tkazilmoqda. Bloger Isroil Tillaboyevning yozishicha, Farg‘ona va Marg‘ilon shaharlaridagi imtihonlar stadionlarda o‘tkazilgan.
Blogerning yozishicha, imtihon uchun o‘quvchilar soat 07:30 da stadionga yetib kelgan, imtihonning o‘zi esa 8:10 da boshlangan va 09:30 gacha davom etgan.
“Ikki soat sizni shu issiqqa o‘tirgizib qo‘yishsa, nima bo‘ladi, rasmdagi kishining ko‘ylagini suv bo‘lib ketganini ko‘rdingizmi?
U kishi salqinda jon saqlab turib shunchalik! Yoki quyidagi rasmda sharoit yo‘qligidan (yo‘q bo‘ladiyam-da, bolalarga yo‘q-ku, ota-onalar bilan nima ishimiz bor, deng) bitta daraxt soyasida talashib jips turgan kishilarni ko‘ryapsizmi, kattalar chidolmayapmiz-ku”, — deb yozadi bloger.
Uning so‘zlariga ko‘ra, soat 09:00 larda olingan suratda harorat 35 daraja issiqni ko‘rsatgan va ba’zi bolalar jazirama sabab o‘zini tashlab yuborgan, ularga tibbiy yordam ko‘rsatilgan.
“Bitta maktabga kirish uchun 24 nafar bola oluvchi o‘ringa minglab bolalar shunchalik issiqda qiynalyapti, to‘g‘ri, bu eng yaxshi maktab, orzusi barchaning, lekin baribir bular 10-11 yoshli bolalar-ku”, — deya qayd etadi Tillaboyev.
U imtihonni shahardagi Al-Farg‘oniy bog‘ida o‘tkazish bo‘yicha taklifni o‘rtaga tashlagan:
Farg‘ona viloyati hokimligi, Prezident ta’lim muassasalari agentligi birgalashib mana shu salqin bog‘ni tayyorlasa bo‘lar edi-ku. Atrofiga ikki qator lenta, 10-15 ta ko‘p ichki ishlar xodimi ketadi, xolos, har holda butun viloyat bolalari issiqda kuyib, pishib test yechmasdi, bir kunlik imtihonni deb biror kasal bo‘lib qolishdan saqlanardi.Ana Toshkentda Botanika bog‘i salqinlarida tashkillashtirasizlar-ku. Nega poytaxt bolalarini salqinga, viloyat bolalarini issiqqa qo‘yishlariga indamadilaring? Yoki viloyat bolalari issiqda ko‘p yurib o‘rgangan, dedimi birov?
O‘rtoqlar! Shu bolalar hammamizning bolalarimiz, nav-nihollar. Qani tibbiyot olimlarimiz, gapiringlar, shu issiqning bola sog‘lig‘iga ziyoni yo‘qmi? Yo‘q, ziyon qilmaydi, denglar, biz rozi.
Hali 3 kun ertalab 08:00 da va kech soat 19:00 da ham imtihonlar bo‘ladi. 19:00 dagi imtihonga 17:30 dan boshlab keladi bolalar, unda ham 40 darajada issiqdan kam bo‘lmaydi, bolalar imtihonga kirguncha o‘zi tamom bo‘ladi...
Aytgancha, bitta narsaga lolman, bolalarni imtihonga kiritib yuborishda ota-ona-yu bolalar orasida yarim santimetr joy yo‘q, tiqilinch, imtihonga kirgach ikki metr ijtimoiy masofa saqlab qo‘yilgani ma’nosi nima ekan?
Bunday tashkillashtirishlarini kutmagandim. Agentlik va viloyat hokimliklaridan bolalar sog‘lig‘i kerak bo‘lsa, zudlik bilan ushbu imtihonlarni salqin joyga, bog‘larga ko‘chirishlarini ota-onalar va o‘qituvchilar nomidan talab qilamiz!
Avvalroq O‘zbekistonda prezident maktabi bitiruvchilari davlat OTMlariga imtihonsiz grant asosida qabul qilinishi to‘g‘risida xabar berilgandi.
Izoh (0)