Тошкент вилояти Олмалиқ шаҳрига элтувчи А-373 трассасида жазирамада ялпи ҳашар ўтказилаётгани ҳақида хабар берилганди. Мазкур ҳолат юзасидан вилоят Бандлик бош бошқармаси изоҳ берди.
Маълум қилинишича, вилоят Бандлик бош бошқармаси томонидан Вазирлар Маҳкамасининг 2017 йил 5 октябрдаги 799-сон қарори билан тасдиқланган «Ҳақ тўланадиган жамоат ишларини ташкил қилиш тартиби тўғрисида»ги низом ижроси юзасидан вақтинчалик ташкил этилган ҳақ тўланадиган жамоат ишларида ишлаган фуқароларга тегишли тартибда ойлик иш ҳақлари тўлаб берилади.
«Тасвирлардаги фуқароларнинг аксарияти ободонлаштириш ходимлари бўлиб, улар меҳнат қонунчилигида белгиланган тартибда, иш кунида ўз вазифаларини бажармоқда.
Шунингдек, иш ҳажми катталиги боис ҳашар йўли орқали вилоят Бандлик бош бошқармаси томонидан жамоат ишчилари ҳам вақтинчалик ишга ихтиёрий жалб қилинган. Уларнинг ҳам иш ҳақлари белгиланган тартибда тўлаб берилади», – дейилади бошқарма изоҳида.
Бундан аввал Қашқадарёда ходимларини мажбурий меҳнатга жалб қилган тиббиёт бирлашмаси бошлиғи 12 млн сўм жаримага тортилгани, Ўрта Чирчиқда тиббиёт ходимларини мажбурий меҳнатга жалб этган поликлиника раҳбари жаримага тортилгани ҳамда ходимини ҳақорат қилган Ўрта Чирчиқ ободонлаштириш бошқармаси бошлиғи ишдан олингани ҳақида хабар берилганди.
Изоҳ (0)