O‘zbekistonga avtoyo‘l orqali chegaradan o‘tib kelgan xorij fuqarolarida koronavirus aniqlansa, ular respublika hududiga kiritilmaydi

AOKAda Koronavirusga qarshi kurash shtabi a’zosi Botir Qurbonov ishtirokida o‘tkazilgan brifingda O‘zbekistonda COVID-19’ga qarshi kurash doirasida qilinayotgan ishlar, emlash jarayonidagi muhim vazifalar to‘g‘risida ma’lumot berildi.

Respublika hududiga koronavirus infeksiyasining chetdan kirib kelishining oldini olish maqsadida 20-iyuldan boshlab O‘zbekiston chegarasidan avtoyo‘l chegara o‘tkazish punkti orqali kirib kelayotgan shaxslarni o‘z mablag‘lari hisobidan chegara o‘tkazish punktlarida ekspress antigen test usulida tahlil topshirishlari kerak va manfiy natija qayd etilgan holdagina, respublika hududiga kiritilishiga ruxsat beriladi.

Shu bilan birga, avtoyo‘l chegaralarida ekspress antigen test tahlilida musbat natija qayd etiladigan bo‘lsa, chet el fuqarolari yoki O‘zbekistonda doimiy yashash fuqaroligi bo‘lmagan shaxslar respublika hududiga kiritilmaydi. Bunda O‘zbekistonda faoliyat yuritayotgan va istiqomat qilayotgan chet el fuqarolari hamda mamlakatda doimiy yashaydigan fuqaroligi bo‘lmagan shaxslar mustasno sanaladi.

O‘zbekiston fuqarolari va O‘zbekistonda yashashga ruxsat berilgan fuqarolarda koronavirus infeksiyasi aniqlanganda COVID-19 bo‘yicha tashkil etilgan maxsus shifoxonalar yoki kasallik darajasiga ko‘ra uy sharoitida davolanishga yo‘naltiriladi.

Shuningdek, So‘x tumani, Shohimardon, Cho‘nqara, Toshtepa aholi punktlarida chegara hududlaridagi avtotransport chegarasi alohida hudud deb yuritilib, O‘zbekiston tomonidan tranzit tarzda borayotgan O‘zbekiston fuqarolaridan koronavirus infeksiyasiga barcha turdagi test tahlillarini topshirish talab etilmaydi.

Mazkur tartib alohida hududlarga kirib-chiqayotgan Qirg‘iziston fuqarolariga tatbiq etiladi.

Har kuni ishga O‘zbekiston va Qirg‘iziston davlatlari o‘rtasida kunlik qatnab, faoliyat amalga oshirayotgan shaxslarga alohida imtiyoz berildi.

Ma’lumot uchun, O‘zbekistonda 28-iyundan karantin cheklovlari kuchaytirildi. Toshkent shahriga 28-iyundan transport vositalari kirishiga hamda ko‘ngilochar va ovqatlanish obyektlari faoliyatiga cheklovlar o‘rnatildi.