Turkiyada kuchli yomg‘irlar tufayli suv toshqinlari yuz berdi (foto, video)

Turkiya shimoli-sharqidagi Rizo va Artvin viloyatlarida kuchli yomg‘irlar tufayli suv toshqinlari yuz berdi. Ushbu hududlarda tabiiy ofat oqibatini bartaraf etish hamda qidiruv-qutqaruv ishlari boshlangan. Bu haqda mamlakat Favqulodda vaziyatlar boshqarmasi axborotiga asoslanib “RIA Novosti” xabar berdi.

“Bugun kuchli yomg‘irlar oqibatida Artvin viloyatidagi Arxavi hududida suv toshqini yuz berdi. Arxavi daryosi toshgan va aholi yashaydigan turar joylardagi yo‘llar suv ostida qolgan. Tabiiy ofat oqibatida zarar ko‘rgan fuqarolarni izlash va qutqarish ishlari davom ettirilmoqda. Rizo viloyatidagi Findikli tumanida ham Arxavi bilan deyarli bir xil vaziyat hukmronlik qilmoqda”, — deyiladi Turkiya Favqulodda vaziyatlar boshqarmasining ma’lumotida.

Suv toshqinlari yuz bergan hududlarga Turkiya ichki ishlar vaziri Sulaymon So‘ylu yetib kelgan. Uning so‘zlariga ko‘ra, toshqin oqibatida odamlar halok bo‘lmagan, ammo ikki nafar fuqaroga tan jarohati yetgan.

Avval Tojikistonda sel kelishi oqibatida kamida 10 nafar odam hayotdan ko‘z yumgani, Xitoyda suv toshqini tufayli 100 ming kishi evakuatsiya qilingani, metroni suv bosishi oqibatida o‘nlab odamlar halok bo‘lgani xabar qilindi.

13-iyul kuni Namangan viloyati Kosonsoy tumanida sel kelishi oqibatida 8 kishi halok bo‘lgan, keyinchalik 17-iyulda tabiiy ofat qurbonlarining soni 9 nafarga yetgandi. 20-iyulda Shahrisabzning Ko‘l qishlog‘iga sel kelib, qishloqqa olib kiruvchi yagona yo‘l 10 soatga yopilib qolgan, Shahrisabz tuman favqulodda vaziyatlar bo‘limi mazkur holatga rasmiy izoh bergandi.

Shuningdek, 20-iyulda Namanganda sel oqibatida ikkita ko‘prik shikastlangan, Andijon viloyatida ham kuchli yomg‘ir kuzatilgandi, 21-iyulda suv toshqinidan jabrlangan 132 nafar fuqaro evakuatsiya qilingan va suv bosgan hududlarda dezinfeksiya ishlari olib borilgan.