Toshkentda Mudofaa vazirligiga tegishli binoning ta’mirlash ishlarini olib berish evaziga qurilish firmasi boshlig‘idan 30 ming dollar olayotgan shaxslar ushlandi

Toshkent shahri va Toshkent viloyatida firibgalik bilan bog‘liq holatlarga chek qo‘yildi, deya “Daryo”ga xabar bermoqda DXX matbuot xizmati.

Qurilish faoliyati bilan shug‘ullanuvchi MChJ rahbari va yuriskonsulti 4 nafar jinoiy sherigi bilan kelishgan holda, boshqa bir qurilish firmasi boshlig‘iga Mudofaa vazirligining Toshkent shahrida joylashgan harbiy qismlaridan birida rejalashtirilgan 65 milliard so‘mlik kapital ta’mirlash ishlarini olib berish evaziga, shartnoma qiymatining 4 foizi miqdorida pul berishini talab qiladi va oldindan 30 ming AQSh dollari so‘raydi.

DXXning Toshkent viloyati bo‘yicha boshqarmasi, viloyat prokuraturasi va iqtisodiy jinoyatlarga qarshi kurashish Departamentining hududiy boshqarmasi xodimlari tomonidan o‘tkazilgan tezkor tadbirda ular so‘ralgan pulni olgan vaqtlarida ashyoviy dalillar bilan ushlandi.

Dastlabki surishtiruv harakatlari davomida mazkur shaxslar Mudofaa vazirligining umumiy qiymati 110 milliard so‘mni tashkil etuvchi boshqa qurilish obyektlarini surxondaryolik ikki mijozga olib berishni rejalashtirgani ham ma’lum bo‘ldi.

Toshkent viloyatida kuzatilgan yana bir shunga o‘xshash holatda esa 1973-yil Farg‘ona viloyatida tug‘ilgan shaxs va 1978-yil Qashqadaryo viloyatida tug‘ilgan fuqaro Chinoz tumanidagi xususiy uy-joy mulkdorlari shirkatlaridan birining rahbari bo‘lib ishlovchi 1975-yilda tug‘ilgan ayol hamda muqaddam xususiy uy-joy mulkdorlari shirkatlari tizimida faoliyat yuritgan 1972-yilda tug‘ilgan ayol bilan kelishgan holda, qurilish firmasi vakiliga ushbu hududdagi ko‘p qavatli uylarda umumiy qiymati 5 milliard so‘mlik qurilish-montaj ishlarini olib berish evaziga undan 25 ming AQSh dollari talab qiladi.

O‘tkazilgan tezkor tadbirda ular avans sifatida 10 ming dollar olgan vaqtlarida ushlandi.

Hozirda mazkur shaxslarga nisbatan Jinoyat kodeksining tegishli moddalariga asosan jinoyat ishlari qo‘zg‘atilib, tergov harakatlari olib borilmoqda.