Тошкентда Мудофаа вазирлигига тегишли бинонинг таъмирлаш ишларини олиб бериш эвазига қурилиш фирмаси бошлиғидан 30 минг доллар олаётган шахслар ушланди

Тошкент шаҳри ва Тошкент вилоятида фирибгалик билан боғлиқ ҳолатларга чек қўйилди, дея «Дарё»га хабар бермоқда ДХХ матбуот хизмати.

Қурилиш фаолияти билан шуғулланувчи МЧЖ раҳбари ва юрисконсульти 4 нафар жиноий шериги билан келишган ҳолда, бошқа бир қурилиш фирмаси бошлиғига Мудофаа вазирлигининг Тошкент шаҳрида жойлашган ҳарбий қисмларидан бирида режалаштирилган 65 миллиард сўмлик капитал таъмирлаш ишларини олиб бериш эвазига, шартнома қийматининг 4 фоизи миқдорида пул беришини талаб қилади ва олдиндан 30 минг АҚШ доллари сўрайди.

ДХХнинг Тошкент вилояти бўйича бошқармаси, вилоят прокуратураси ва иқтисодий жиноятларга қарши курашиш Департаментининг ҳудудий бошқармаси ходимлари томонидан ўтказилган тезкор тадбирда улар сўралган пулни олган вақтларида ашёвий далиллар билан ушланди.

Дастлабки суриштирув ҳаракатлари давомида мазкур шахслар Мудофаа вазирлигининг умумий қиймати 110 миллиард сўмни ташкил этувчи бошқа қурилиш объектларини сурхондарёлик икки мижозга олиб беришни режалаштиргани ҳам маълум бўлди.

Тошкент вилоятида кузатилган яна бир шунга ўхшаш ҳолатда эса 1973 йил Фарғона вилоятида туғилган шахс ва 1978 йил Қашқадарё вилоятида туғилган фуқаро Чиноз туманидаги хусусий уй-жой мулкдорлари ширкатларидан бирининг раҳбари бўлиб ишловчи 1975 йилда туғилган аёл ҳамда муқаддам хусусий уй-жой мулкдорлари ширкатлари тизимида фаолият юритган 1972 йилда туғилган аёл билан келишган ҳолда, қурилиш фирмаси вакилига ушбу ҳудуддаги кўп қаватли уйларда умумий қиймати 5 миллиард сўмлик қурилиш-монтаж ишларини олиб бериш эвазига ундан 25 минг АҚШ доллари талаб қилади.

Ўтказилган тезкор тадбирда улар аванс сифатида 10 минг доллар олган вақтларида ушланди.

Ҳозирда мазкур шахсларга нисбатан Жиноят кодексининг тегишли моддаларига асосан жиноят ишлари қўзғатилиб, тергов ҳаракатлари олиб борилмоқда.