Toshkent viloyatida IIV akademiyasi qoshidagi serjantlar tayyorlash maktabiga o‘qishga kiritib qo‘yish evaziga fuqarodan 13 ming dollar talab qilgan shaxs ushlandi. Bu haqda DXX matbuot xizmati “Daryo”ga xabar qildi.
Toshkent viloyatida yashovchi, muqaddam ichki ishlar idoralarida ishlagan shaxs jinoiy sherigi bilan kelishgan holda o‘zganing ishonchiga kirib, uning pul mablag‘ini o‘zlashtirishni reja qiladi.
U ichki ishlar organlaridagi mansabdor tanishlari orqali Toshkent shahrida yashovchi fuqaroni IIV akademiyasi qoshidagi serjantlar tayyorlash maktabiga o‘qishga kiritib qo‘yish evaziga 13 ming AQSh dollari talab qiladi.
DXXning Toshkent shahar boshqarmasi xodimlari tomonidan Bosh prokuratura huzuridagi Departamentning shahar boshqarmasi xodimlari bilan hamkorlikda o‘tkazgan tezkor tadbirida firibgarlar so‘ralgan puldan 6 ming dollarini olgan vaqtida ushlandi.
Bundan avval Toshkentda fuqaroni Jismoniy tarbiya universitetiga o‘qishga kiritib qo‘yish uchun 7 ming dollar so‘ragan o‘qituvchi qo‘lga olingani, Farg‘onada talabaning o‘qishini xorij universitetidan O‘zbekistonga ko‘chirib berish evaziga 8 ming dollar olgan o‘qituvchi qo‘lga olingani hamda Jizzaxda 18 ming dollar evaziga ikki fuqaroni xorij universitetiga o‘qishga kiritib qo‘yishni va’da qilgan shaxslar ushlangani haqida xabar berilgandi.
Izoh (0)