Тошкент вилоятида ИИВ академияси қошидаги сержантлар тайёрлаш мактабига ўқишга киритиб қўйиш эвазига фуқародан 13 минг доллар талаб қилган шахс ушланди. Бу ҳақда ДХХ матбуот хизмати «Дарё»га хабар қилди.
Тошкент вилоятида яшовчи, муқаддам ички ишлар идораларида ишлаган шахс жиноий шериги билан келишган ҳолда ўзганинг ишончига кириб, унинг пул маблағини ўзлаштиришни режа қилади.
У ички ишлар органларидаги мансабдор танишлари орқали Тошкент шаҳрида яшовчи фуқарони ИИВ академияси қошидаги сержантлар тайёрлаш мактабига ўқишга киритиб қўйиш эвазига 13 минг АҚШ доллари талаб қилади.
ДХХнинг Тошкент шаҳар бошқармаси ходимлари томонидан Бош прокуратура ҳузуридаги Департаментнинг шаҳар бошқармаси ходимлари билан ҳамкорликда ўтказган тезкор тадбирида фирибгарлар сўралган пулдан 6 минг долларини олган вақтида ушланди.
Бундан аввал Тошкентда фуқарони Жисмоний тарбия университетига ўқишга киритиб қўйиш учун 7 минг доллар сўраган ўқитувчи қўлга олингани, Фарғонада талабанинг ўқишини хориж университетидан Ўзбекистонга кўчириб бериш эвазига 8 минг доллар олган ўқитувчи қўлга олингани ҳамда Жиззахда 18 минг доллар эвазига икки фуқарони хориж университетига ўқишга киритиб қўйишни ваъда қилган шахслар ушлангани ҳақида хабар берилганди.
Изоҳ (0)