Jizzax viloyati Sharof Rashidov tumanida spirtli ichimlik ta’sirida bo‘lgan ikki fuqaroning janjali o‘lim bilan yakunlandi. Bu haqda viloyat prokuraturasiga tayanib, “Xalq so‘zi online” xabar berdi.
Ma’lum qilinishicha, 15-iyul kuni soat 00:30 larda Sharof Rashidov tumanidagi mahallalarning birida yashovchi M.Sh. o‘zining yashash xonadonida tanishi M.U. bilan spirtli ichimlik iste’mol qilgan. Shundan so‘ng o‘rtada yuzaga kelgan janjal natijasida M.Sh. stol ustida turgan oshxona pichog‘i bilan M.U. boshining chap yuqori chakka qismiga bir marotaba urgan. Oqibatda M.U. olgan tan jarohatidan vafot etgan.
Tayinlangan sudga oid tibbiyot ekspertizasining dastlabki xulosasida fuqaro M.U.ning o‘limiga chap chakka sohasiga o‘tkir tig‘li jism bilan sanchilib kesilgan jarohat, bosh gematomasi va ichki qon ketish sabab bo‘lgani ko‘rsatilgan.
Mazkur holat yuzasidan Sharof Rashidov tuman prokuraturasi tomonidan Jinoyat kodeksining 97-moddasi (qasddan odam o‘ldirish) 1-qismi bilan jinoyat ishi qo‘zg‘atilgan bo‘lib, dastlabki tergov harakatlari olib borilmoqda.
Avvalroq Navoiyda spirtli ichimlik ta’sirida tanishini pichoqlab o‘ldirgan mashina ustasi 10 yilga qamalgani, Olmaliqda 22 yoshli yigit o‘zidan 3 yosh katta shaxsni pichoqlab, o‘ldirib qo‘ygani, Surxondaryoda onasini haqorat qilgan qarindoshini pichoqlab o‘ldirgan shaxsga jinoiy ish ochilgani, Buxoroda 63 yoshli erkak yer talashib, singlisini pichoqlab qo‘ygani, Jizzaxda xotinini xiyonat qilishda ayblab, uni o‘ldirib qo‘ygan shaxs 14 yilga qamalgani to‘g‘risida xabar berilgandi.
Izoh (0)