Жиззах вилояти Шароф Рашидов туманида спиртли ичимлик таъсирида бўлган икки фуқаронинг жанжали ўлим билан якунланди. Бу ҳақда вилоят прокуратурасига таяниб, «Халқ сўзи online» хабар берди.
Маълум қилинишича, 15 июль куни соат 00:30 ларда Шароф Рашидов туманидаги маҳаллаларнинг бирида яшовчи М.Ш. ўзининг яшаш хонадонида таниши М.У. билан спиртли ичимлик истеъмол қилган. Шундан сўнг ўртада юзага келган жанжал натижасида М.Ш. стол устида турган ошхона пичоғи билан М.У. бошининг чап юқори чакка қисмига бир маротаба урган. Оқибатда М.У. олган тан жароҳатидан вафот этган.
Тайинланган судга оид тиббиёт экспертизасининг дастлабки хулосасида фуқаро М.У.нинг ўлимига чап чакка соҳасига ўткир тиғли жисм билан санчилиб кесилган жароҳат, бош гематомаси ва ички қон кетиш сабаб бўлгани кўрсатилган.
Мазкур ҳолат юзасидан Шароф Рашидов туман прокуратураси томонидан Жиноят кодексининг 97-моддаси (қасддан одам ўлдириш) 1-қисми билан жиноят иши қўзғатилган бўлиб, дастлабки тергов ҳаракатлари олиб борилмоқда.
Аввалроқ Навоийда спиртли ичимлик таъсирида танишини пичоқлаб ўлдирган машина устаси 10 йилга қамалгани, Олмалиқда 22 ёшли йигит ўзидан 3 ёш катта шахсни пичоқлаб, ўлдириб қўйгани, Сурхондарёда онасини ҳақорат қилган қариндошини пичоқлаб ўлдирган шахсга жиноий иш очилгани, Бухорода 63 ёшли эркак ер талашиб, синглисини пичоқлаб қўйгани, Жиззахда хотинини хиёнат қилишда айблаб, уни ўлдириб қўйган шахс 14 йилга қамалгани тўғрисида хабар берилганди.
Изоҳ (0)