19-iyul kuni Sobiq MMA jangchisi Murod Xonto‘rayev avtohalokatga uchrab, vafot etgani to‘g‘risida xabar berilgandi. IIV YHXBB axborot xizmati yo‘l-transport hodisasiga oid qo‘shimcha ma’lumotlar bilan bo‘lishdi.
Ma’lum qilinishicha, 19-iyul kuni soat 11:30 larda Toshkent viloyati Bo‘stonliq tumani hududidan o‘tuvchi 4R-12 avtomobil yo‘lining 68-kilometrida bir yo‘nalishda harakatlanib ketayotgan Lacetti hamda BMW X5 rusumli avtomobillar ishtirokida to‘qnashuv sodir bo‘lgan. To‘qnashuv oqibatida BMW X5 rusumli avtomobil yo‘ldan chiqib ketib, ag‘darilgan.
Oqibatda BMW X5 rusumli avtomobil haydovchisi, 1987-yilda tug‘ilgan Murod Xonto‘rayev voqea joyida vafot etgan va ushbu avtomobil yo‘lovchisi tan jarohati bilan shifoxonaga olib ketilgan.
Mazkur YTH yuzasidan Bo‘stonliq tumani IIB huzuridagi Tergov bo‘limi tomonidan dastlabki surishtiruv harakatlari olib borilmoqda.
Ma’lumot uchun, “Osiyo ayig‘i” laqabi bilan mashhur bo‘lgan Xonto‘rayev 1987-yilda Toshkent shahrida tug‘ilgan. U o‘zining MMA’dagi professional faoliyatini 2013- yilda boshlagan.
Izoh (0)