АОКА бўлим бошлиғи Қудратов Жавоҳир Неъматуллаевич 38 ёшида коронавирус оқибатида вафот этди. Бу ҳақда агентлик «Дарё»га хабар қилди.
Маълум қилинишича, Жавоҳир Қудратов Зангиотадаги ковид-марказнинг жонлантириш бўлимида ётган.
Жавоҳир Қудратов 1983 йил 12 ноябрда Шаҳрисабз туманида туғилган. У Ўзбекистон давлат жаҳон тиллари ва Ўзбекистон Миллий университетларини тамомлаган.
Қудратов Тошкент халқаро радиоси, Оммавий коммуникациялар соҳасидаги мониторинг маркази, «Қашқадарё» – «Новости Кашкадари» газеталари, Бандлик ва меҳнат муносабатлари вазирлиги, Ахборот хавфсизлиги ва жамоат тартибини таъминлашга кўмаклашиш маркази, Ахборот технологиялари ва коммуникацияларини ривожлантириш вазирлиги ҳамда бошқа ташкилотларда самарали фаолият олиб борган.
2019 йилдан буён Ахборот ва оммавий коммуникациялар агентлигининг бўлим бошлиғи сифатида фаолият кўрсатаётган эди.
Бундан аввал Олий Мажлис депутати Абдураҳим Қурбонов 47 ёшида коронавирус асоратларидан вафот этгани, Ўзбекистоннинг Беларусдаги элчихонаси ходими коронавирус оқибатида вафот этгани ҳамда Ўзбекистон халқ артисти Мирза Азизов 58 ёшида вафот этгани ҳақида хабар берилганди.
Изоҳ (0)