Андижон вилоятида коронавирусга чалинган ҳар бир беморга ташхис қўйиш ҳамда касалликнинг даволаш усулларини белгилаш мақсадида ўтказиладиган, ўпканинг мултиспирал компьютер томографияси текшируви учун тўланадиган сумманинг 50 фоизи маҳаллий бюджет маблағлари ҳисобидан қопланади. Бу ҳақда «Дарё»га вилоят Соғлиқни сақлаш бошқармаси бошлиғи Салоҳиддин Юсупов маълум қилди.
Салоҳиддин Юсуповнинг қайд этишича, коронавирус инфекциясига чалинган беморларга ташхис қўйиш ҳамда касалликни даволаш усулларини белгилаш учун ўпкани компьютер томография (МСКТ) қилиш энг самарали усул ҳисобланади. Унинг таъкидлашича, вилоятда ҳозирда ишчи ҳолатдаги мавжуд давлат тиббиёт муассасаларидаги компьютер томография аппаратлари аҳолига етарли даражада хизмат кўрсата олмайди.«Ҳозирда вилоятдаги 5 та хусусий тиббиёт муассасасидаги 7 та МСКТ аппаратида текширувлар амалга оширилмоқда. Ушбу текширувларнинг нархи ҳар бири ўртача 220—250 минг сўмни ташкил этади. Вилоят ҳокими Шуҳрат Абдураҳмонов ташаббуси билан аҳолининг имконияти чекланган қисми учун компьютер томография текширувига тўланадиган хизмат ҳақининг 50 фоизи маҳаллий бюджет маблағлари ҳисобидан қоплаб берилиши белгиланди. Натижада ҳар бир текширув нархи 100—120 минг сўмга тушади. Бунинг учун хусусий тиббиёт муассасаларида текширувдан ўтадиганлар ўзлари яшайдиган ҳудудий кўп тармоқли марказий поликлиникадан махсус бланкада йўлланма олиб келишлари лозим бўлади. Дастлабки ҳисоб-китобларга кўра, ҳар бир компьютер томография аппарати бир кунда 50 нафар беморни текширувдан ўтказса, бир ойда 1500 нафар беморни қамраб олиш имкониятига эга бўлади. Натижада бир ойда ўртача 10 минг 500 нафар бемор имтиёзли текширувдан ўтказилиши таъминланади. Ушбу хусусий тиббиёт муассасаларига маҳаллий бюджет маблағлари ҳисобидан 1 миллиард 50 миллион сўм маблағ ўтказиб берилиши кўзда тутилган», — дейди Салоҳиддин Юсупов.
Аввалроқ, 14 июль ҳолатига кўра, Андижонда коронавирусга чалинган ҳамда унда гумон қилинган 1061 нафар бемор даволанаётганлиги маълум қилинганди.
Изоҳ (0)