Shavkat Mirziyoyev “Yoshlarni har tomonlama qo‘llab-quvvatlash va ularning ijtimoiy faolligini yanada oshirishga oid qo‘shimcha chora-tadbirlar to‘g‘risida”gi farmonni imzoladi. Bu haqda Telegram’dagi “Nigoh” kanali xabar berdi.
Farmon bilan:
- avgust oyida “temir daftar”ga kiritilgan oilalarning 18 yoshgacha bo‘lgan har bir farzandlari (o‘quv qurollari, kitob, kiyim-kechak) uchun 500 ming so‘mdan bir martalik moddiy yordam ko‘rsatiladi. Ushbu maqsadlar uchun 128 ming bolaga davlat budjetidan mablag‘ ajratiladi.
- “Temir daftar”ga kiritilgan oilalarning oliy ta’lim muassasalarida ta’lim olayotgan farzandlarining 2021/2022-o‘quv yilida to‘lov-kontrakt summasi birinchi o‘quv yili uchun davlat budjeti mablag‘lari hisobidan qoplab beriladi.
Farmonga ko‘ra, 1-sentabrdan talabalar uchun Markaziy bankning asosiy foiz stavkasi (14 foiz) miqdorida imtiyozli ta’lim kreditlarini berish joriy etiladi.
Bundan tashqari, nufuzli xalqaro reyting agentliklarining yetakchi 500 talik ro‘yxatiga kirgan xorijiy oliy ta’lim tashkilotlarini tamomlagan yoki ularda ilmiy daraja olgan yosh mutaxassislarning lavozim maoshiga qo‘shimchalar to‘lash tizimi joriy etiladi.
Qayd etilishicha, sentabr oyidan boshlab Toshkent shahrida ilg‘or xorijiy tajriba asosida Yoshlar biznes maktabi faoliyati yo‘lga qo‘yilib, unda shu yilda 1,4 ming nafar yoshlarga tadbirkorlik va biznes yuritishda yaxshi natijalarga erishish va xavf-xatarlardan himoyalanish usullari o‘rgatiladi. 2022-yilda Yoshlar biznes maktabining respublika miqyosida filiallari tashkil etiladi.
1-sentabrdan yoshlarning “Biznesga birinchi qadam” startap loyihalari tanlovi doirasida har bir tuman va shaharda 3 nafardan g‘oliblarga grantlar berish amaliyoti joriy etiladi. Loyihalarning har biri uchun 50 million so‘mlik grantlar beriladi.
Avvalroq Vazirlar Mahkamasining 11-martdagi qaroriga muvofiq, “yoshlar daftari”ga kiritilganlarga 980 ming so‘mgacha bir martalik yordam ko‘rsatilishi hamda “temir daftar”ga kiritilgan oilalar farzandlarining to‘lov-kontrakt summasi 50 foizigacha to‘lab berilishi haqida xabar berilgan edi.
Izoh (0)