Xalq ta’limi vazirligi xodimlari 6 oyda “komandirovka”lar uchun qancha mablag‘ sarflagani ma’lum bo‘ldi

Xalq ta’limi vazirligi o‘z xodimlarning xizmat safarlari to‘g‘risidagi ma’lumotlarni e’lon qildi.

Eslatib o‘tamiz, O‘zbekiston Prezidentining “Davlat organlari va tashkilotlarining faoliyati ochiqligini ta’minlash, shuningdek, jamoatchilik nazoratini samarali amalga oshirishga doir qo‘shimcha chora-tadbirlar to‘g‘risida”gi 2021-yil 16-iyundagi farmonida mansabdor shaxslarning xizmat safarlari va xorijdan tashrif buyurgan mehmonlarni kutib olish xarajatlarini rasmiy veb-saytlariga joylashtirish hamda ularni har chorakda yangilab borish belgilangan.

Xalq ta’limi vazirligi matbuot xizmati xabariga ko‘ra, 2021-yilning dastlabki yarim yilligida joylarda ta’lim sohasida amalga oshirilayotgan islohotlar, ta’limni rivojlantirish istiqbollarini o‘rganish maqsadida hamda Rrspublika ishchi guruhlari tarkibida vazirlik rahbariyati hamda markaziy apparatining mutaxassis xodimlari 267-marta respublikaning turli hududlariga xizmat safarlarini amalga oshirgan.

Hisob-kitoblarga ko‘ra, mazkur safarlar uchun 395,5 million so‘m miqdorida xarajat qilingan.

“Aytish joizki, xizmat safarlari doirasida maktablarda yaratilgan sharoitlar, ta’lim sifati, maktablarda ta’lim darajasini oshirish, ta’lim muassasalarining yer maydonlari va daxlsizligi, ulardan unumli foydalanish, maktab binolarini soz holatda saqlash kabi masalalarga e’tibor qaratilgan”, — deyiladi xabarda.