Қашқадарё вилоятининг Шаҳрисабз шаҳрида 2021 йилнинг 13—15 июнь кунлари бўлиб ўтган ёшлар фестивалида катта экраннинг уч кунлик ижарасига 440 миллион сўм сарфлангани маълум бўлди. Бу ҳақда Давлат харидлари бўйича махсус ахборот порталига таяниб, «Қашқадарё» газетаси хабар бермоқда.
«Фестиваль доирасида биргина зар сепадиган мосламага 15 миллион сўм, 100 дона 50 метрлик гирляндалар учун эса 21,5 миллион сўм сарфланган. Аммо энг қиммати — фестиваль бўлиб ўтган жойда ўрнатилган 150 квадрат метрлик LED экран ижарасидир. Унинг уч кун давомида ишлатилиши вилоят бюджетига 440 миллион сўмга тушган», — дейилади нашрнинг бу ҳақдаги мақоласида.
Қайд этилишича, 2021 йилнинг 13—15 июнь кунлари ўтказилган Шаҳрисабз шаҳридаги «Янги Ўзбекистон ёшлари, бирлашайлик!» шиори остидаги фестиваль учун вилоят маҳаллий бюджетининг захира жамғарма маблағлари ҳисобидан 1 миллиард 517 миллион 800 минг сўм ажратилган.
Вилоят нашри бир йил давомида муҳим ижтимоий аҳамиятга молик лойиҳаларни амалга ошириш учун вилоятдаги нодавлат нотижорат ташкилотлари ва фуқаролик жамиятининг бошқа институтларига энг кўпи билан 30 миллион сўмдан грант берилишини ёзиб, ёшлар фестивалидаги LED экраннинг уч кунлик ижараси тахминан 15 та ННТнинг грантига тенглигини ҳисоб-китоб қилади.
«Яна бир қизиқ, аммо тушуниш анча қийин бўлган томони шундан иборатки, Шаҳрисабз шаҳрида 13—15 июнда бўлиб ўтган фестивални бошқариш ва ташкил этиш учун хизмат кўрсатувчи корхонани танлаш 24 июнда амалга оширилган. 2021 йил 24 июндаги танлов баёнига кўра, шу куни вилоят ҳокимлигининг бир қатор масъул ходимлари ‘Замин СТВ’ хусусий корхонаси, ‘Чортоқ стар медиа’ МЧЖ ва ‘Замин нур медиа’ МЧЖ томонидан тақдим этилган тижорат таклифларни ўрганиб чиқишди ва нархи арзонлиги ва сифати яхшилигини эътиборга олиб, ‘Замин СТВ’ ХК хизматларини танлашди.
Бу баённи кўриб, кулишингни ҳам, йиғлашингни ҳам билмайсан киши. Наҳотки, 24 июнда танлов ўтказган ва унинг баёнига имзо чеккан масъул шахслар ёшлар фестивали тахминан 10 кун олдин якунланганини билишмаган бўлса? Билишса, нега танловни фестивалдан олдин эмас, анча кейин ўтказишди? Ёки ҳаммасига ҳокимнинг қарори кеч (21 июнда) чиқарилгани сабаб бўлдими?», — дея савол беради мақола муаллифи.
Вилоят ҳокимлиги нашридаги мақола «Катта дабдаба билан тўй қилаётган одамларни ортиқча сарф-харажатдан қайтаришга уринсангиз, улар ‘Биз орзу-ҳавас қилганмиз, биринчи навбатда ёшлар бахтини ўйлаймиз’ дея рад қилишади, аммо аслида кимгадир ўзининг куч-қудрати, салоҳияти ва имкониятларини кўз-кўз қилишни мўлжаллашади. Шу маънода уларнинг Шаҳрисабздаги ёшлар фестивали ташкилотчилари билан ўхшашлиги бор, чамамизда. Биргина фарқи, тўй қилаётганлар ўз чўнтагидан пул сарфлайди...», деган мулоҳаза билан якунланади.
Изоҳ (0)