Rossiyaning Novosibirsk shahrida ikki oyog‘idan ayrilib, xotirasini yo‘qotgan o‘zbekistonlik ayol Vatanga qaytarildi, deya xabar bermoqda Tashqi mehnat migratsiyasi agentligi.
Novosibirsk shahridagi O‘zbekistonning bosh konsulxonasi hamda Tashqi mehnat migratsiya agentligining Novosibirsk shahridagi vakolatxonasi hamkorligida G.N. ismli fuqaro Novosibirsk—Samarqand aviareysi orqali O‘zbekistonga qaytarildi.
“Daryo” xodimining xabar berishicha, ayol Samarqand shahrida tug‘ilgan, 60 yoshda. Issiqxonada ishchi bo‘lib ishlagan, oyog‘ini sovuq urishi oqibatida kelib chiqqan kasallik sabab operatsiya orqali kesib tashlangan, 30—40 foiz xotirasini yo‘qotgan.
Bundan bir necha yillar ilgari ishlash maqsadida Novosibirsk shahriga kelgan fuqaroning hayoti shifokorlar yordamida saqlab qolingan.
Fuqaroga bosh konsulxona tomonidan “Vatanga qaytish guvohnomasi” rasmiylashtirildi, homiylik mablag‘lari hisobidan aviachipta sotib olishga ko‘maklashildi.
Bundan avval Rossiyada majburiy mehnatdan qochib, ikki oyog‘idan ajralgan O‘zbekiston fuqarosiga yordam ko‘rsatilgani, Rossiyaga ketib, 18 yil bedarak yo‘qolgan O‘zbekiston fuqarosi vatanga qaytarilgani hamda Rossiyada baxtsiz hodisaga uchragan o‘zbekistonlik ona va bolaga yordam ko‘rsatilgani haqida xabar berilgandi.
Izoh (0)