Россиянинг Новосибирск шаҳрида икки оёғидан айрилиб, хотирасини йўқотган ўзбекистонлик аёл Ватанга қайтарилди, дея хабар бермоқда Ташқи меҳнат миграцияси агентлиги.
Новосибирск шаҳридаги Ўзбекистоннинг бош консулхонаси ҳамда Ташқи меҳнат миграция агентлигининг Новосибирск шаҳридаги ваколатхонаси ҳамкорлигида Г.Н. исмли фуқаро Новосибирск—Самарқанд авиарейси орқали Ўзбекистонга қайтарилди.
«Дарё» ходимининг хабар беришича, аёл Самарқанд шаҳрида туғилган, 60 ёшда. Иссиқхонада ишчи бўлиб ишлаган, оёғини совуқ уриши оқибатида келиб чиққан касаллик сабаб операция орқали кесиб ташланган, 30—40 фоиз хотирасини йўқотган.
Бундан бир неча йиллар илгари ишлаш мақсадида Новосибирск шаҳрига келган фуқаронинг ҳаёти шифокорлар ёрдамида сақлаб қолинган.
Фуқарога бош консулхона томонидан «Ватанга қайтиш гувоҳномаси» расмийлаштирилди, ҳомийлик маблағлари ҳисобидан авиачипта сотиб олишга кўмаклашилди.
Бундан аввал Россияда мажбурий меҳнатдан қочиб, икки оёғидан ажралган Ўзбекистон фуқаросига ёрдам кўрсатилгани, Россияга кетиб, 18 йил бедарак йўқолган Ўзбекистон фуқароси ватанга қайтарилгани ҳамда Россияда бахтсиз ҳодисага учраган ўзбекистонлик она ва болага ёрдам кўрсатилгани ҳақида хабар берилганди.
Изоҳ (0)