O‘zbekiston tashqi ishlar vaziri Abdulaziz Komilov 2021-yilning 9-iyul kuni Rossiya tashqi ishlar vaziri Sergey Lavrov bilan telefon orqali muloqot qildi. Bu haqda vazirlik rasmiy vakili xabar qildi.
Suhbat chog‘ida O‘zbekiston—Rossiya hamkorligi masalalari muhokama qilindi. Mintaqaviy xavfsizlik, jumladan, Afg‘onistondagi vaziyat yuzasidan fikr almashildi.
Rossiya tomonining “Markaziy va Janubiy Osiyo: mintaqaviy bog‘liqlik. Tahdidlar va imkoniyatlar” mavzusidagi xalqaro konferensiyadagi ishtirokiga alohida e’tibor qaratildi.
Bundan avval Markaziy Osiyo TIV rahbarlari Afg‘onistondagi vaziyatni muhokama qilgani, Shavkat Mirziyoyev Vladimir Putin bilan Afg‘onistonning shimoliy hududlaridagi vaziyatni muhokama qilgani hamda Shavkat Mirziyoyev va Emomali Rahmon Afg‘onistondagi keskinlikning kuchayishi bilan bog‘liq vaziyatni muhokama qilgani haqida xabar berilgandi.