Qirg‘iziston poytaxti ko‘chalari bo‘ylab O‘zbekistonda ishlab chiqarilgan 50 ta yangi avtobuslar qatnovni boshladi. Bu haqda Bishkek meriyasiga tayanib, “Kaktus.Media” xabar berdi.
Isuzu markasidagi avtobuslarning uzunligi 6,9 metrni tashkil etadi, eshiklari ikkita, 38 nafar yo‘lovchi uchun mo‘ljallangan, o‘rindiqlar soni 16 ta.
Bishkek hokimligi saytida qayd etilishicha, O‘zbekistondan Bishkekka 2021—2023-yillar davomida ming dona avtobus yetkazib beriladi.
Bu haqda 11-may kuni Bishkek hokimligi va yetkazib beruvchi kompaniya — “Eko-passajirskiye perevozki” o‘rtasida hamkorlik memorandumi imzolangan bo‘lib, unga ko‘ra, 2021-yil oxiriga qadar 350 ta Isuzu avtobusi Bishkekka yetkazilishi kerak.
Eslatib o‘tamiz, iyun oyining o‘rtalarida O‘zbekistonda ishlab chiqarilgan Isuzu avtobuslarining 21 tasi Bishkek ko‘chalarida qatnay boshlagani to‘g‘risida xabar berilgandi.
Izoh (0)