Buxoro shahrining markaziy ko‘chalari bo‘ylab otliq patrul xizmati yo‘lga qo‘yildi. Bu haqda “Daryo”ga Milliy gvardiyaning viloyat boshqarmasi katta leytenanti Farrux Qilichev ma’lum qildi.
Ta’kidlanishicha, 2021-yilning 30-iyun kuni Prezident Shavkat Mirziyoyev yoshlar bilan uchrashuvda ot sportini rivojlantirish hamda Milliy gvardiya faoliyatida otliq patrul xizmatini yo‘lga qo‘yish to‘g‘risida to‘xtalib o‘tgan.
“2021-yilning 3-iyul kunidan boshlab Milliy gvardiya viloyat boshqarmasi tomonidan Buxoro shahrining markaziy ko‘chalari, dam olish maskanlari va sayilgohlarda nazoratni olib borish maqsadida otliq patrul xizmati yo‘lga qo‘yildi. Tashkil etilgan otryad vazifalari ochiq joylarda o‘tkaziladigan ommaviy tadbirlar chog‘ida jamoat tartibini saqlash va jamoat xavfsizligini ta’minlashda yuqori harakatchanlik hamda mobil to‘siqlar va halqalar tashkil etilishini ta’minlashdan iborat”, — dedi Farrux Qilichev.
Qayd etilishicha, otliq otryad Buxoro shahrining markaziy ko‘chalari, dam olish zonalari va aholi gavjum bo‘ladigan joylarida jamoat tartibini saqlab, fuqarolar xavfsizligini ta’minlash, huquqbuzarlarni ushlash bo‘yicha kechiktirib bo‘lmaydigan choralarni ko‘radi.
Bildirilishicha, Buxoro markaziy ko‘chalari bo‘ylab xizmat vazifasini o‘tayotgan nasldor otlar Germaniya va Ispaniyadan keltirilgan.
“Ular har qanday shovqin-suronga ko‘nikma hosil qilgan. Avtomobillarning tovushli signallari, gavjum ko‘chalar bo‘ylab odamlarning harakatlari otlarni hurkitmaydi. Yana shuni qo‘shimcha qilamizki, hozirda shaxsiy tarkibni o‘qitish, ularning bilim saviyasi, jangovar shayligi, ot minish ko‘nikmalari, xizmat yo‘nalishida qanday tartibda harakatlanishi bo‘yicha ham darslar olib borilmoqda”, — dedi mas’ullar.
Qo‘shimcha qilinishicha, otliq patrullar fuqarolarga tez tibbiy yordam ham ko‘rsata oladi.
Izoh (0)