Бухоро шаҳрининг марказий кўчалари бўйлаб отлиқ патруль хизмати йўлга қўйилди. Бу ҳақда «Дарё»га Миллий гвардиянинг вилоят бошқармаси катта лейтенанти Фаррух Қиличев маълум қилди.
Таъкидланишича, 2021 йилнинг 30 июнь куни Президент Шавкат Мирзиёев ёшлар билан учрашувда от спортини ривожлантириш ҳамда Миллий гвардия фаолиятида отлиқ патруль хизматини йўлга қўйиш тўғрисида тўхталиб ўтган.
«2021 йилнинг 3 июль кунидан бошлаб Миллий гвардия вилоят бошқармаси томонидан Бухоро шаҳрининг марказий кўчалари, дам олиш масканлари ва сайилгоҳларда назоратни олиб бориш мақсадида отлиқ патруль хизмати йўлга қўйилди. Ташкил этилган отряд вазифалари очиқ жойларда ўтказиладиган оммавий тадбирлар чоғида жамоат тартибини сақлаш ва жамоат хавфсизлигини таъминлашда юқори ҳаракатчанлик ҳамда мобил тўсиқлар ва ҳалқалар ташкил этилишини таъминлашдан иборат», — деди Фаррух Қиличев.
Қайд этилишича, отлиқ отряд Бухоро шаҳрининг марказий кўчалари, дам олиш зоналари ва аҳоли гавжум бўладиган жойларида жамоат тартибини сақлаб, фуқаролар хавфсизлигини таъминлаш, ҳуқуқбузарларни ушлаш бўйича кечиктириб бўлмайдиган чораларни кўради.
Билдирилишича, Бухоро марказий кўчалари бўйлаб хизмат вазифасини ўтаётган наслдор отлар Германия ва Испаниядан келтирилган.
«Улар ҳар қандай шовқин-суронга кўникма ҳосил қилган. Автомобильларнинг товушли сигналлари, гавжум кўчалар бўйлаб одамларнинг ҳаракатлари отларни ҳуркитмайди. Яна шуни қўшимча қиламизки, ҳозирда шахсий таркибни ўқитиш, уларнинг билим савияси, жанговар шайлиги, от миниш кўникмалари, хизмат йўналишида қандай тартибда ҳаракатланиши бўйича ҳам дарслар олиб борилмоқда», — деди масъуллар.
Қўшимча қилинишича, отлиқ патруллар фуқароларга тез тиббий ёрдам ҳам кўрсата олади.
Изоҳ (0)