Namangan shahridagi “Diyor” tantanalar majmuasida viloyatdagi oliy o‘quv yurtlarining qator korxona va tashkilotlar bilan hamkorlik shartnomalarini imzolash marosimi bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Prezident Shavkat Mirziyoyev raisligida 2021-yil 16-iyun kuni o‘tkazilgan videoselektor yig‘ilishida oliy ta’lim muassasalari talabani o‘qishga qabul qilishdan avval ularni qayerga ishga yuborishini bilishi, buning uchun ish beruvchilar bilan kamida 10 yillik shartnomaga ega bo‘lishlari zarurligi ta’kidlab o‘tilgandi.
Ushbu ko‘rsatmaga muvofiq viloyat OTMlaridagi 84 ta kafedra ta’lim va ilmiy tadqiqot yo‘nalishlariga mos bo‘lgan 300 dan ortiq xorijiy, markaziy va mahalliy korxona-tashkilotlar bilan o‘quv, ilmiy va kadrlar bilan ta’minlash sohalari bo‘yicha hamkorlikni yo‘lga qo‘ydi.
“Diyor” tantanalar majmuasida bo‘lib o‘tgan hamkorlik shartnomasini imzolash marosimida OTMlar 50 dan ortiq muassasa, korxona va tashkilotlar bilan 10 yillik hamkorlik istiqbollarini rasman kelishib oldi.
Jumladan, Namangan davlat universiteti viloyat xalq ta’limi, maktabgacha ta’lim boshqarmalari va IT Park Namangan filiali, Namangan muhandislik-qurilish instituti viloyat avtomobil yo‘llari boshqarmasi, “Namangan hududiy elektr tarmoqlari” aksiyadorlik jamiyati va “Kadeer parts industry” korxonasi, Namangan muhandisliklik texnologiyalari instituti “Istiqlol dizayn” markazi, Art Soft Tex holding kompaniyasi va “Namanganmash” aksiyadorlik jamiyati bilan shartnomalar imzoladi.
Mamlakatda ilk bor o‘tkazilgan OTMlarning hamkor korxona-tashkilotlar bilan kelishuv shartnomalarini imzolash marosimida viloyat hokimi Shavkat Abdurazzaqov ishtirok etdi.
Izoh (0)