Koronavirusga qarshi kurashish shtabi a’zosi, tibbiyot fanlari doktori Sevara Ubaydullayeva 2-iyul, juma kuni AOKAda bo‘lib o‘tgan brifingda surunkali kasalliklari bo‘lmagan, karantin qoidalariga rioya qiluvchi, immuniteti kuchli kishilar vaksina olmasa ham bo‘ladimi, degan savolga javob berdi.
“Sizning immunitetingiz qanchalik mustahkam bo‘lsa-da, hech qanday surunkali kasalliklaringiz bo‘lmasa-da, karantin qoidalariga rioya qilsangiz-da, oila a’zolaringiz yoki hamkasblaringiz sizchalik karantin qoidalariga rioya qilmayotgan bo‘lishi mumkin. Agar ulardan kimlardir karantin qoidalariga rioya qilmasligi bilan kasallik yashirin kechayotgan odam bilan kontaktda bo‘lib qolib, kasallik yuqtirib olsa, siz niqob taqmagan paytingizda ulardan kasallik yuqtirib olishingiz ham mumkin”, — deydi Sevara Ubaydullayeva.
Uning so‘zlariga ko‘ra, bugungi kunda butun dunyoda va O‘zbekistonda tarqalayotgan virusning shtammlari yuqishi oqibatida o‘zining jadal kechishi hamda yashirin ravishda organizmni kuchli jarohatlashi kuzatilmoqda.
“Siz organizmingizda kechayotgan jarayonni bilmay ham qolishingiz mumkin. Vaksina esa kasallikdan himoya va agarda vaksina olish jarayonida kasallik yuqib qolsa ham yengil kechishiga ta’sir qiladi va bu insonni og‘ir hamda o‘ta og‘ir darajada kasallik o‘tkazishdan himoya qiladi”, — deydi Koronavirusga qarshi kurashish shtabi a’zosi.
Sevara Ubaydullayevaning aytishicha, vaksina qaysi davlatda ishlab chiqilganidan qat’i nazar, bugungi kunda kuzatilayotgan virusning yuqumliligi kuchaygan shtammni yengish uchun yagona himoya vositasidir. “Bu vaksinani olishingiz kerak”, — deb ta’kidladi u.
Avvalroq Sevara Ubaydullayeva organizmda antitanalar yuqori bo‘lsa ham vaksina olish mumkinmi, degan savolga javob bergandi, shuningdek, nega vaksinalarni ikki yoki uch marta olish kerakligi haqida ma’lumot bergandi.
Izoh (0)