Наманган шаҳридаги «Диёр» тантаналар мажмуасида вилоятдаги олий ўқув юртларининг қатор корхона ва ташкилотлар билан ҳамкорлик шартномаларини имзолаш маросими бўлиб ўтди. Бу ҳақда «Дарё» мухбири Азизбек Абдувалиев хабар бермоқда.
Президент Шавкат Мирзиёев раислигида 2021 йил 16 июнь куни ўтказилган видеоселектор йиғилишида олий таълим муассасалари талабани ўқишга қабул қилишдан аввал уларни қаерга ишга юборишини билиши, бунинг учун иш берувчилар билан камида 10 йиллик шартномага эга бўлишлари зарурлиги таъкидлаб ўтилганди.
Ушбу кўрсатмага мувофиқ вилоят ОТМларидаги 84 та кафедра таълим ва илмий тадқиқот йўналишларига мос бўлган 300 дан ортиқ хорижий, марказий ва маҳаллий корхона-ташкилотлар билан ўқув, илмий ва кадрлар билан таъминлаш соҳалари бўйича ҳамкорликни йўлга қўйди.
«Диёр» тантаналар мажмуасида бўлиб ўтган ҳамкорлик шартномасини имзолаш маросимида ОТМлар 50 дан ортиқ муассаса, корхона ва ташкилотлар билан 10 йиллик ҳамкорлик истиқболларини расман келишиб олди.
Жумладан, Наманган давлат университети вилоят халқ таълими, мактабгача таълим бошқармалари ва IT Park Наманган филиали, Наманган муҳандислик-қурилиш институти вилоят автомобиль йўллари бошқармаси, «Наманган ҳудудий электр тармоқлари» акциядорлик жамияти ва «Kadeer parts industry» корхонаси, Наманган муҳандисликлик технологиялари институти «Истиқлол дизайн» маркази, Art Soft Tex holding компанияси ва «Наманганмаш» акциядорлик жамияти билан шартномалар имзолади.
Мамлакатда илк бор ўтказилган ОТМларнинг ҳамкор корхона-ташкилотлар билан келишув шартномаларини имзолаш маросимида вилоят ҳокими Шавкат Абдураззақов иштирок этди.
Изоҳ (0)