O‘zbekistonda koronavirusga qarshi eng ko‘p qaysi vaksina qo‘llanilgani ma’lum qilindi

Koronavirusga qarshi kurashish shtabi a’zosi Botir Qurbonov AOKAda o‘tkazilgan brifingda mamlakatda o‘zbek—xitoy vaksinasi eng ommabop ekanini aytdi.

Emlanganlarning 77 foizi ZF-UZ-VAC2001 vaksinasidan foydalangan, 18 foizi AstraZeneca (CoViShield), 5 foizi — “Sputnik V” vaksinasi bilan emlangan.

Ma’lumot uchun, bugungi kungacha O‘zbekistonda jami 3 680 361 doza vaksinadan foydalanildi. Ulardan:

• 1-bosqich emlanganlar 2 158 045 nafarni,
• 2-bosqichda emlanganlar 1 224 271 nafarni,
• 3-bosqichda emlanganlar 298 045 nafarni tashkil qilmoqda.

Jami emlashlar bo‘yicha yuqori ko‘rsatkichlar quyidagi hududlarda kuzatilgan:

• Namangan viloyatida — 442 315 doza;
• Farg‘ona viloyatida — 423 601 doza;
• Andijon viloyatida — 408 816 doza.

Ma’lumot uchun, O‘zbekistonning vaksina zaxirasi 7,4 million dozaga yetgan. Mamlakatda iyun oyi oxirigacha 4 million kishini koronavirusga qarshi emlash rejalashtirilgandi. O‘zbekistonda koronavirusga qarshi emlanuvchilar guruhi yana kengaydi. Endi 50 yosh va undan kattalar bepul vaksina olishi mumkin. Toshkentda 28-iyundan 18 yoshdan katta bo‘lgan barcha qatlamni koronavirus infeksiyasiga qarshi davlat budjeti mablag‘lari hisobidan ixtiyoriy tarzda ommaviy emlanash boshlandi.