Taksi haydovchisi, savdogar va quruvchi. O‘zbekiston yoshlari qaysi sohada ishlashni orzu qilishi aniqlandi

O‘zbekiston yoshlari, eng avvalo, ishlab chiqarish, savdo, qurilish va transport sohasida ishlashni orzu qiladi, deb xabar berdi “Ijtimoiy fikr” jamoatchilik fikrini o‘rganish markazi.

Markaz tomonidan “Yangi O‘zbekiston yoshlari: hayotiy pozitsiyalar va qadriyat ustuvorliklari” tadqiqoti o‘tkazilgan.

So‘rovnomaga ko‘ra, yoshlar qiziqishi bo‘yicha reytingning birinchi o‘rnini sanoat sohasi egallagan. Ko‘proq yoshlar o‘zlarining kasbiy va mehnat faoliyatini ushbu yo‘nalish bilan bog‘lashni xohlaydi. Ish qidirayotgan yoshlarning bir qismi savdo sohasida faoliyat yuritishni ham niyat qilmoqda.

So‘rovnomaga ko‘ra, yoshlar o‘rtasida qurilish va transport sohasi mashhurligi bo‘yicha uchinchi o‘rinda turadi. Qayd etilishicha, yoshlar ushbu sohalarning katta istiqbollari borligiga ishonadi.

Ta’lim va fan to‘rtinchi o‘rinda qayd etilgan bo‘lsa, dasturlash va IT texnologiyalari beshinchi, biznes oltinchi o‘rinni egallagan.

Tadqiqot davomida yoshlar fikriga ko‘ra, yechimini kutayotgan eng dolzarb muammolar ham aniqlandi. So‘rov ishtirokchilari uchun ishsizlik, shu jumladan, yoshlar orasida munosib ish haqi bilan munosib ish qidirish eng dolzarb muammo bo‘lib tuyuladi. Shuningdek, yoshlarning fikriga ko‘ra, koronavirus pandemiyasi hozirgi zamonning dolzarb muammosiga aylangan.

Yosh avlod vakillarining fikriga ko‘ra, korrupsiya, shuningdek, poraxo‘rlik va ta’magirlik zamonaviy jamiyatda dolzarb muammo bo‘lib, alohida e’tibor talab qiladi.

Shu bilan birga, qatnashchilarning 91,4 foizi o‘zlarining oilaviy turmush tarzidan qoniqish hosil qilishini ma’lum qilgan. Ularning 56,7 foizi turmush tarzidan “to‘liq qoniqaman” deb javob bergan bo‘lsa, 34,7 foiz yoshlar o‘zlari va yaqinlarining hayotidan “ko‘proq qoniqish”ini bildirgan.

So‘rovnoma shuni ko‘rsatdiki, yoshlarning mutlaq ko‘pchiligi — 86,9 foizi kelajakka ishonchi komil va undan umidvor.