Shavkat Mirziyoyev Toshkentdagi 13 ta yirik ko‘chmas obyektni sotuvga chiqarish zarurligini ta’kidladi

Shavkat Mirziyoyev raisligida 1-iyul kuni davlat aktivlarini xususiylashtirish sohasidagi ishlar natijadorligi va kelgusidagi ustuvor vazifalar muhokamasi yuzasidan videoselektor yig‘ilishi o‘tkazildi, deya xabar bermoqda Prezident matbuot xizmati.

Yig‘ilish davomida Toshkent shahridagi 13 ta yirik ko‘chmas obyekti hamda 11 ta tarmoq korxonasidagi davlat ulushlarini xorijiy konsultantlarni jalb qilgan holda, sotuvga chiqarish zarurligi ta’kidlandi.

Viloyat, tuman va shahar hokimlariga o‘z vakolatidagi 154 ta bo‘sh turgan obyektni bir oy muddatda savdoga chiqarish vazifasi qo‘yildi.

Hokimliklar tomonidan sotuvga chiqarilgan mulklar sotilganda, hududlar ixtiyorida qoladigan mablag‘lar ulushi 73 foizdan 87 foizga oshiriladigan bo‘ldi. Bu mablag‘lar viloyat va tumanlar (shahar) budjetlari o‘rtasida teng taqsimlanadi.

Bundan avval Coca-Cola Uzbekistan’dagi davlat ulushi sotilishining uchinchi bosqichi yakunlangani, “Ohangaronsement”ning 84,19 foiz ulushi Kipr kompaniyasi ixtiyoriga o‘tgani hamda Timur Ishmetov 2021-yil yakunigacha O‘zbekistondagi yana bir yirik bank xususiylashtirilishini aytgani haqida xabar berilgandi.