Qashqadaryo viloyatining Chiroqchi tumanida o‘ldirib ketilgan 25 yoshli yigitning qotili 23 yoshli ayol ekani aytilmoqda. Bu haqda “Daryo” manbasi xabar berdi.
Ta’kidlanishicha, qotillik jinoyati 2021-yilning 29-iyun kuni viloyat IIB xodimlari sa’y-harakati bilan oshkor qilingan.
“IIB xodimlariga rahmat, ular tun-u kun mehnat qilib, jinoyatchini topdi”, — deydi “Daryo” manbasi.
“Daryo” muxbirining voqeaga aniqlik kiritishicha, marhum yigit qotil ayolni yoshligidan sevgan. Qiz esa boshqa birovga turmushga chiqqan.
“Bilishimcha, marhum sevgan qizi boshqa birovga turmushga chiqqan bo‘lishiga qaramasdan uni qayta-qayta uchrashuvga chaqirgan. Hatto chiqmasa, o‘tmishi haqida oshkor qilish bilan ham qo‘rqitgan bo‘lishi mumkin. Shu sababmi yoki boshqa bir asos bormi, ayol uchrashuvga chiqib, yigitning ko‘ksiga pichoq sanchgan”, — deydi “Daryo” muxbiri bilan suhbatlashgan manba.
Qo‘shimcha qilinishicha, voqea yuzasidan Jinoyat kodeksining 97-moddasi 1-qismi (qasddan odam o‘ldirish) bilan jinoyat ishi qo‘zg‘atilgan.
Mazkur holat bo‘yicha viloyat prokuraturasi hozircha rasmiy ma’lumot bermadi.
Eslatib o‘tamiz, 2021-yil 26-iyun kuni ertalab soat 08:00 da Chiroqchi tumanining “Langar” MFYga qarashli To‘raqul qishlog‘ida yashovchi 1996-yilda tug‘ilgan J.N.ning pichoqlangan jasadi topilgani, marhum yigit san’atkor bo‘lgani hamda shu qishloqning chekkasida do‘kon yuritgani, marhumni qishloqdoshlari so‘nggi marta 25-iyun kuni kechki soat 23:00 da ko‘rgani xabar berilgandi.
Izoh (0)