AQSh Afg‘onistondan qo‘shinlarini olib chiqish jarayonini bir necha kun ichida yakunlashi mumkin. Bu haqda rasmiy manbalariga asoslanib, CNN xabar berdi.

Foto: Reuters

“Bu haftadagi eng muhim ish qo‘shinlarni olib chiqib ketish va ularni ortga qaytarish jarayonini yakunlash bo‘lishi mumkin”, — dedi Mudofaa vazirligi vakili CNN’ga.

AQSh prezidenti Jo Bayden Afg‘onistondagi qo‘shinlarini 11-sentabrga qadar olib chiqishga va’da bergandi.

Shu bilan birga, ma’muriyat mansabdorlaridan birining CNN’ga xabar qilishicha, qo‘shinlar rasmiy ravishda olib chiqib ketilgandan so‘ng AQShning Kobuldagi elchixonasi va shahar aeroporti xavfsizligini ta’minlashga yordam berish uchun mamlakatda 1000 ga yaqin AQSh harbiylari qolishi mumkin.

Mudofaa vazirligi vakili esa elchixonalarni qo‘riqlash va poytaxt aeroportida xavfsizlikni ta’minlash uchun Afg‘onistondagi AQSh qo‘shinlarining taxminiy soni hozirda 650 kishidan oshmasligini aytdi.

Pentagon vakili Jon Kirbining jurnalistlarga ma’lum qilishicha, AQSh qo‘shinlarining olib chiqib ketilishi NATOning Afg‘onistondagi “Qat’iy ko‘mak” missiyasi tugashini anglatmaydi.

CNN ta’kidlashicha, “Tolibon” butun mamlakat bo‘ylab yoyilar ekan, Amerika razvedkasining hisob-kitoblari Afg‘onistonda hokimiyat “Tolibon” qo‘liga o‘tishi mumkinligini istisno qilmayapti.

Afg‘onistondagi AQSh va NATO kuchlarining qo‘mondoni general Ostin Miller The New York Times’ga bergan intervyusida zo‘ravonlik harakatlarining davom etishi fuqarolar urushiga olib kelishi mumkinligi haqida ogohlantirib, bu esa butun dunyoni tashvishga solishi kerakligini ta’kidlagandi.

Avvalroq Afg‘oniston hukumati AQSh qo‘shinlari olib ketilganidan olti oy o‘tgach qulashi mumkinligi xabar qilingandi. Bunga qadar Amerika razvedkasi Afg‘oniston prezidenti Ashraf G‘ani hukumati AQSh qo‘shinlarining ko‘magisiz kamida ikki yilga bardosh bera oladi, degan fikrda edi. Biroq so‘nggi paytlarda keskinlikning kuchayishi, hukumat kuchlari va “Tolibon” harakati a’zolari o‘rtasidagi to‘qnashuvlar fonida AQSh razvedkasi o‘z prognozini o‘zgartirdi.