Rossiyada koronavirusning delta-plyus shtammini yuqtirish bo‘yicha birinchi holat aniqlandi. Bu haqda “Rospotrebnadzor” rahbari Anna Popova ma’lum qildi, deb yozmoqda “RBK”.
Avvalroq Smorodintsyev gripp ilmiy-tadqiqot instituti ushbu turdagi virusni yuqtirgan birinchi bemor haqida xabar bergan.
“Shunga aniqlik kiritmoqchimanki, o‘tgan hafta xabar qilingan shtamm haqidagi barcha ma’lumotlarni juda ehtiyotkorlik bilan tekshirdik. Ma’lumot tasdiqlandi: bu haqiqatan ham delta-plyus variantidir. Ushbu kasallikning yengil shaklini o‘tkazgan ayol bilan hammasi yaxshi tugadi. Ammo men sizning e’tiboringizni bugungi kunda ommaviy vaksinatsiyani amalga oshirish juda muhim ekaniga qaratmoqchiman, ” — dedi Popova COVID-19 ga qarshi kurash bo‘yicha Muvofiqlashtiruvchi kengash prezidiumi yig‘ilishida.
Ma’lumot uchun delta-plyus koronavirus “hindcha” (delta) shtammining yangi turi. Mutaxassislar fikriga ko‘ra, delta-plyus o‘ta yuqumli bo‘lib, hatto uning tashuvchisi yonidan niqobsiz o‘tib ketish ham xavfli.
Gamaleya nomidagi epidemiologiya va mikrobiologiya ilmiy-tadqiqot markazi direktori Aleksandr Gintsburgning ma’lum qilishicha, Rossiyada koronavirusga chalinish bo‘yicha aniqlangan holatlarning 90 foizni “hindcha” shtamm tashkil qiladi.
Shuningdek, u COVID-19 bilan kasallanganlarni ham emlanishga chaqirdi. Bu qonda virusni zararsizlantiradigan antitanalar titrini oshirishga imkon beradi.
“Mamlakatimizda COVID-19 ga qarshi samarali vaksina mavjud, bu “Sputnik V” vaksinasi, hech bo‘lmaganda Rossiya hududida pandemiyani tugatish uchun preparatdan imkon qadar tez va keng foydalanish kerak. Bu kasallik juda makkor, uni yengil shaklda o‘tkazish — ushbu kasallikdan himoyalanishni anglatmaydi”, — deya ta’kidladi Gintsburg.
Uning qo‘shimcha qilishicha, agar emlash kampaniyasi o‘z maqsadlariga erishmasa, og‘ir va o‘limga olib keladigan holatlarning nisbati 1—2 foizdan 5—10 foizgacha ko‘tarilishi mumkin. Bunga yo‘l qo‘ymaslik uchun aholining 70 foizini ikki-to‘rt oy ichida emlash kerak.
O‘tgan kun davomida Rossiyada pandemiya boshidan buyon eng ko‘p o‘lim soni qayd etildi — 652. Mamlakatdagi COVID-19 qurbonlarining umumiy soni 134 545 kishiga yetdi. Shu paytgacha Rossiyadagi 85 ta hududda jami 5 493 557 kishida infeksiya qayd etilgan, shularning 4 984 037 nafari kasallikdan sog‘aygan.
Izoh (0)