Kanadaning Britaniya Kolumbiyasi provinsiyasidagi turli shaharlarda so‘nggi bir necha kun ichida 200 dan ortiq odam favqulodda yuqori harorat qurboniga aylandi. Provinsiyada havo harorati rekord (49°С) darajaga yetgan. Bu haqda mahalliy politsiyaga asoslanib, CBC xabar berdi.
Britaniya Kolumbiyasida 25-iyun kuni boshlangan jazirama havo tufayli 233 ta o‘lim qayd etildi. Vankuver shahri politsiyasi to‘satdan o‘limlar haqida 65 ta xabar kelib tushganini aytdi, Syurrey shahrida esa so‘nggi ikki kun ichida jazirama tufayli 38 kishi vafot etgan. Politsiya hisob-kitoblariga ko‘ra, bunday holatlar soni odatda kuniga to‘rt-beshtadan oshmasdi. Marhumlarning aksariyati keksaygan yoki surunkali kasalliklarga chalingan. Politsiya issiqlikni o‘limga olib keladigan omillardan biri deb bilmoqda.
Provinsiyadagi Litton shaharchasi ketma-ket uch kundan buyon havo harorati bo‘yicha rekord o‘rnatmoqda. 29-iyun kuni shaharchada 49,6 daraja issiqlik qayd etildi. 28-iyun kuni harorat 47,9 darajaga, 27-kuni esa 46,6 darajaga ko‘tarilgandi. So‘nggi marta Kanadada 1837-yilda eng yuqori— 45 daraja issiqlik qayd etilgan. Litton Vankuverdan 260 kilometr shimoli-sharqda joylashgan.
Britaniya Kolumbiyasi provinsiyasidagi aksariyat uylarda konditsioner mavjud emas, chunki yozda harorat mo‘tadilroq bo‘ladi. Ayni paytda Litton fuqarosining ma’lum qilishicha, shaharda vaziyat chidab bo‘lmas darajada, ko‘chaga chiqish deyarli imkonsiz. “Biz issiq va quruq issiqqa o‘rganib qolganmiz, ammo baribir 47 daraja, bu sizga 30 daraja emas”, — dedi u.
Vankuver va uning atrofida sovitish markazlari va vaqtinchalik favvoralar tashkil etilgan. Politsiya patrul xizmatini kuchaytirdi. Favqulodda vaziyatlar xizmatlariga bosim kuchaydi.
Kanada meteorologiya xizmati Britaniya Kolumbiyasi, Alberta va Saskachevanning ayrim hududlarini, Manitoba va shimoli-g‘arbiy mintaqani issiq ob-havo to‘g‘risida ogohlantirdi.
Muassasaning katta iqlimshunosi Devid Filips Kanada dunyodagi eng qorli va eng sovuq ikkinchi mamlakat ekanini ta’kidladi. “Bizni tez-tez sovuq uradi, qor bo‘ronlari kuzatiladi, lekin bunday issiqlik haqida kamdan kam gapirish mumkin. Hozir Dubayda havo bizdan salqinroq”, — dedi u.
Izoh (0)