KXDR yetakchisi Kim Chen In Koreya Mehnat partiyasi yig‘ilishida yuqori lavozimli amaldorlarni koronavirus tarqalishining oldini olishda qobiliyatsizlik va mas’uliyatsizlikda aybladi. Bu haqda Koreya Markaziy telegraf agentligiga tayanib, “RBK” xabar berdi.
Uning so‘zlariga ko‘ra, epidemiyaga qarshi kurash paytida yo‘l qo‘yilgan xatolar mamlakat va uning aholisi xavfsizligiga tahdid soladigan o‘ziga xos “jiddiy hodisa”ga sabab bo‘ldi. U aynan qanday hodisa haqida gap ketayotganiga aniqlik kiritmadi.
Shuningdek, Kim Chen In rasmiylarni “rahbarlar orasida keng tarqalgan eskicha fikrlash” uchun tanqid qildi.
Reuters xabariga ko‘ra, yig‘ilishda Shimoliy Koreya rahbariyati siyosiy byuroning bir nechta a’zolari, partiya Markaziy qo‘mitasi kotiblari va bir nechta davlat idoralari rasmiylari almashtirilishini e’lon qildi. Bu Kim Chen Inning rasmiylar pandemiyaga qarshi kurashish bo‘yicha mas’uliyatni qay darajada uddalaganidan norozi ekani bilan bog‘liq yoki yo‘qligi noma’lum.
Pxenyan mamlakatda koronavirus yo‘qligi haqida bir necha bor xabar bergan. Biroq 2020-yil iyul oyida Kim Chen In COVID-19 gumon qilinayotgan birinchi holatni e’lon qilib, Ishchilar partiyasi siyosiy byurosining favqulodda yig‘ilishini chaqirgandi.
Jahon sog‘liqni saqlash tashkiloti (JSST)ning 2021-yil iyun oyi oxiridagi ma’lumotlaridan kelib chiqadigan bo‘lsak, mamlakat shu paytgacha koronavirus yuqtirish yoki infeksiyadan o‘lim holatlari haqida hisobot bermagan.
2020-yil yanvar oyida KXDR quruqlik, dengiz va havo chegaralarini yopdi, shuningdek, mamlakat ichkarisida harakatlanishga jiddiy cheklovlar qo‘ydi. Shimoliy Koreyaning sog‘liqni saqlash tizimida COVID-19 epidemiyasini bartaraf etish uchun zarur bo‘lgan resurslar, mablag‘ va texnologiyalar yetishmaydi, deb yozgan Financial Times. Mamlakat JSST COVAX mexanizmi orqali vaksinalardan foydalanish huquqiga ega, ammo dori vositalarini yetkazib beruvchi xorijiy ko‘mak xodimlari va tibbiyot mutaxassislari uchun KXDRga kirish taqiqlangan.
Avvalroq Shimoliy Koreyada koronavirus tarqalishiga qarshi kurash uchun o‘rnatilgan qattiq cheklovlar sharoitida xalqaro gumanitar tashkilotlar, xususan, Jahon oziq-ovqat dasturining so‘nggi xodimlari mamlakatni tark etishga majbur bo‘lgani haqida xabar berilgandi. Cheklovlar tufayli KXDRda allaqachon 12 ta elchixona yopilgan. Ularning xodimlari mamlakat hududini tark etgan. Rossiya elchixonasi xodimlari uyga motorsiz temiryo‘l vagonlari bilan qaytishga majbur bo‘lgan edi.
Izoh (0)